సాధారణంగా వంతెన అంటే నీళ్ల మీద వంతెన అనే అభిప్రాయం అందరికీ ఉంటుంది. కాని ఈ వంతెన ఒకింత విచిత్రంగా ఉంది. ఎందుకంటే ఈ వంతెనకు వాహనాల రాకపోకలు లేనట్లు, విడి భాగాలుగా కనిపిస్తుంది. నెదర్లాండ్స్‌లోని వెలువీమీర్‌ సరస్సుపై నిర్మించిన ఈ వంతెనకు ఓ ప్రత్యేకత ఉంది. పై నుంచి నీరు ప్రవహిస్తుంటే కింది నుంచి వాహనాలు వెళ్తుంటాయి. ఇందుకోసం నీటి కింది భాగంలో మూడు మీటర్ల లోతు, 25మీటర్ల పొడవు, 19 మీటర్ల పొడవుతో వాహనాలు ప్రయాణించేందుకు వీలుగా అనువైన మార్గాన్ని నిర్మించారు. అంతేకాదు చుట్టూ నీటితో నిండి ఉన్న ఈ ప్రాంతంలో పాదచారులు ఆస్వాదించడానికి వీలుగా ఫుట్‌పాత్‌లను కూడా నిర్మించారు. చూడటానికి వింతగా ఉండడంతో పాటు మధ్యలో నీరు ప్రవహిస్తున్నట్లు కనిపిస్తున్న ఈ వంతెన ఎంత మనోహరంగా కన్పిస్తుంది కదూ!