తూర్పు అట్లాంటిక్‌ మహాసముద్రంలో జనించిన హరికేన్లలో అతిపెద్దదిగా భావిస్తున్న ఒఫెలియా.. బ్రిటన్‌, ఐర్లాండ్‌ల వైపు కదులుతోంది. పోర్చుగల్‌కు చెందిన అజోర్స్‌ దీవుల్లో శనివారం ఇది భారీ వర్షాలు కురిపించింది. అయితే ఇక్కడ పెద్దగా నష్టమేమీ సంభవించలేదు. ఐర్లాండ్‌, బ్రిటన్‌లను చేరుకునే సరికి ఇది మరింత బలహీనపడుతుందని అధికారులు తెలిపారు. అయినప్పటికీ భవనాలను ధ్వంసం చేయగల శక్తి దీనికి ఉంటుందని.. వరదలు, సముద్రంలో ప్రమాదకర పరిస్థితులకు కారణం అవ్వొచ్చని అన్నారు. ఇప్పటివరకూ తూర్పు అట్లాంటిక్‌లో జనించిన హరికేన్లలో ఒఫెలియానే శక్తిమంతమైనదని.. 1939 తర్వాత ఉత్తరం వైపుగా ఇంతదూరం వచ్చిన మొదటి హరికేన్‌ అని నిపుణులు చెప్పారు. ఐర్లాండ్‌లోని ఐదు కౌంటీల్లో, బ్రిటన్‌లోని కొన్ని ప్రాంతాల్లో సోమవారం నుంచి మంగళవారం వరకు ప్రభుత్వాలు అప్రమత్తత విధించాయి. గంటకు 130 కి.మీ.ల వేగంతో గాలులు వీయొచ్చని అంచనా వేశారు.