- 'స్టాటస్‌ రెడ్‌' ప్రమాద హెచ్చరిక జారీ 
- పాఠశాలలకు సోమవారం సెలవు 
 ఇంతకుముందెన్నడూ లేని విధంగా ఒఫెలియా తుఫాను ఐర్లండ్‌ను వణికించింది. ఈ తుఫాన్‌ ఐర్లండ్‌ను సోమవారం తాకింది.దీంతో పాఠశాలలకు అధికారులు సెలవు ప్రకటించారు. అట్లాంటిక్‌ సముద్రంలోని తూర్పు ప్రాంతంలో ఇప్పటి వరకు ఇంతటి పెద్ద హరికేన్‌ సంభవించినట్లు చరిత్రలో నమోదు కాలేదు. ఐర్లండ్‌ వాతావరణ పరిశోధన సంస్ధ ఎయిరీన్‌ 'స్టాటస్‌ రెడ్‌' ప్రమాద హెచ్చరికను జారీ చేసింది. ఒఫెలియా హరికేన్‌ సోమవారం పగటి సమయంలో వస్తున్నందువల్ల ప్రజల ప్రాణాలకు ప్రమాదం వాటిల్లే అవకాశాలున్నాయని ముందుగానే హెచ్చరించింది. దీంతో సోమవారం పాఠశాలలు మూసి వేయాలని విద్యా శాఖను ప్రభుత్వం ఆదేశించింది.. ఐర్లండ్‌కు పశ్చిమ తీరాన ఉన్న చల్లటి సముద్రాల దిశగా హరికేన్‌ ఒఫెలియా ప్రయాణిస్తూ బలహీన పడుతున్నప్పటికీ, విధ్వంసాన్ని సృష్టించే అవకాశాలున్నాయని వాతావరణ పరిశోధన శాఖ తెలిపింది.