షార్జాలోని అల్‌ తావున్‌ ప్రాంతంలోగల ఓ భవనం నాలుగో అంతస్తు బాల్కనీ నుంచి కిందపడి నాలుగేళ్ళ బాలిక మృతి చెందింది. ఆడుకుంటూ బాల్కనీలో ఉన్న కుర్చీ మీదకు ఎక్కి, అక్కడి నుంచి కిందపడిపోయినట్లు భావిస్తున్నారు. ఘటనా స్థలంలోనే చిన్నారి ప్రాణాలు కోల్పోయింది. సమాచారం అందుకోగానే సంఘటనా స్థలానికి సీఐడీ అధికారులు, ఫోరెన్సిక్‌ మరియు పెట్రోల్స్‌ని పంపించామనీ, అంబులెన్స్‌ అక్కడికి చేరుకునేటప్పటికే రక్తపు మడుగులో అచేతనంగా పడి ఉన్న చిన్నారి కన్పించిందని పోలీసులు వెల్లడించారు. ఫోరెన్సిక్‌ పరీక్షల నిమిత్తం మృతదేహాన్ని ఫోరెన్సిక్‌ లేబరేటరీకి తరలించారు. అల్‌ బుహైరా పోలీస్‌ స్టేషన్‌, ఈ కేసు విచారణ చేపట్టింది. విచారణ నిమిత్తం మృతురాలి తల్లిదండ్రుల్ని పోలీసులు పిలవనున్నారు.