హైదరాబాద్‌: ప్రముఖ నటుడు రాజేంద్రప్రసాద్‌లో మంచి హాస్యనటుడే కాదు గొప్ప వంటవాడు కూడా ఉన్నారని అంటున్నారు నిర్మాత అనిల్‌ సుంకర. రాజ్‌తరుణ్‌ కథానాయకుడిగా నటిస్తున్న చిత్రం 'రాజుగాడు'. ఈ చిత్రానికి అనిల్‌ సుంకర నిర్మాతగా వ్యవహరిస్తున్నారు.
ఇందులో రాజేంద్రప్రసాద్‌ కీలక పాత్రలో నటిస్తున్నారు. అయితే సెట్స్‌లోరాజేంద్రప్రసాద్‌ సరదాగా వంటచేశారట. ఈ విషయాన్ని అనిల్‌ ట్విటర్‌ ద్వారా వెల్లడిస్తూ ఫొటోలు పోస్ట్‌ చేశారు. 'రాజేంద్ర ప్రసాద్‌ సెట్‌లో ఉంటే నవ్వులకే కాదు భోజనానికి కూడా లోటు ఉండదు. రాజ్‌తరుణ్‌ ఆ ఫుడ్‌ను ఎలా దొంగిలించాలా అని ఆలోచిస్తున్నాడు' అని సరదాగా ట్వీట్‌ చేశారు.
ఈ ట్వీట్‌కు రాజ్‌తరుణ్‌ సమాధానమిస్తూ.. 'రాజేంద్రప్రసాద్‌తో కలిసి పనిచేయడం ఎప్పుడూ సరదాగానే ఉంటుంది. ఆ ఫుడ్‌ను దొంగిలిద్దామనుకున్నాను కానీ, ఇంతలో వారే వండిపెట్టేశారు. చాలా రుచికరంగా ఉంది' అని పేర్కొన్నారు.
ఈ చిత్రానికి సంజన రెడ్డి దర్శకత్వం వహిస్తున్నారు. ఇందులో రాజ్‌తరుణ్‌కి జోడీగా బాలీవుడ్‌ నటి అమైరా దస్తర్‌ నటిస్తున్నారు. సంక్రాంతికి ఈ చిత్రం ప్రేక్షకుల ముందుకు రానుంది.