విదేశీ కార్మికులకు ఖతార్‌ గుడ్‌న్యూస్‌ చెప్పింది. విదేశీయులకు నివాస ప్రక్రియలను సులభతరం చేసేందుకు, వారు తమ స్వదేశంలోనే విధానాలన్నింటిన్నీ పూర్తి చేసుకునే వీలు కల్పించింది. ఈ కొత్త ఒప్పందంపై ఖతారీ అంతర్గత వ్యవహారాల మంత్రిత్వ శాఖ, సింగపూర్‌కు చెందిన కంపెనీ సంతకాలు చేసుకున్నాయి. ఖతారీ నివాస ప్రక్రియలన్నింటిన్నీ విదేశీ వర్కర్లు తమ స్వదేశంలోనే పూర్తి చేసుకోవచ్చని ఖతార్‌ న్యూస్‌ ఏజెన్సీ రిపోర్టు చేసినట్టు జిన్హువా న్యూస్ ఏజెన్సీ పేర్కొంది. ఈ ప్రాజెక్టు తొలి దశలో ఎనిమిది దేశాలకు వర్తిస్తుంది. భారత్‌, నేపాల్‌, శ్రీలంక, బంగ్లాదేశ్‌, పాకిస్తాన్‌, ఇండోనేషియా, ఫిలిప్పీన్స్‌, ట్యునీషియాలు ఉన్నాయి. ఖతార్‌ మొత్తం వర్క్‌ఫోర్స్‌లో ఈ దేశాల వారు 80 శాతం ఉంటారు. 

డీల్‌ ప్రకారం విదేశీయులు తమ మెడికల్‌ చెకప్‌, బయోమెట్రిక్‌ డేటా, ఫింగర్‌ప్రింట్‌, వర్క్‌ కాంట్రాక్టులపై సంతకం అన్ని కూడా ఖతార్‌కు రాకముందే తమ స్వదేశంలోనే పూర్తి చేసుకునే అనుమతి ఉంటుంది. ఈ డీల్‌తో మెడికల్‌ టెస్ట్‌లో విఫలమయ్యారని విదేశీ వర్కర్లను దేశంలోకి తిరస్కరించే కేసులు తగ్గుతాయని తెలిసింది. అక్టోబర్‌ మొదట్లోనే ఖతార్‌ ఈ డ్రాఫ్ట్‌ బిల్లును రూపొందించింది. విదేశీ వర్కర్లు తమ ఉద్యోగులు మారడానికి వీలుగా గతేడాదే ఖతార్‌ ప్రభుత్వం కొత్త లేబర్‌ చట్టాన్ని ప్రవేశపెట్టింది.