విదేశీ మహిళపై యాసిడ్‌ దాడి జరిగిన సంఘటన ఉత్తర్‌ప్రదేశ్‌లోని వారణాసిలో శుక్రవారం ఉదయం చోటుచేసుకుంది. వివరాల్లోకెళితే.. వారణాసిలోని కరౌండి ప్రాంతంలో నివసిస్తున్న రష్యా జాతీయురాలైన ఓ 23 ఏళ్ల యువతి ఇంట్లో ఒంటరిగా ఉండగా ఉదయం 4 గంటల ప్రాంతంలో ఓ వ్యక్తి ఇంట్లోకి చొరబడి యువతిపై యాసిడ్‌ దాడి చేసి పరారయ్యాడు. స్థానికులు యువతిని ఆస్పత్రికి తరలించగా ఆమె పరిస్థితి విషమంగా ఉన్నట్లు వైద్యులు తెలిపారు. దాడికి పాల్పడిన వ్యక్తి యువతికి బాగా తెలిసిన వాడై ఉంటాడని పోలీసులు భావిస్తున్నారు. కేసు నమోదు చేసి నిందితుడి కోసం గాలిస్తున్నట్లు వారణాసి ఎస్‌ఎస్పీ తెలిపారు.