రాజకీయాల్లోకి వస్తున్నట్టు నిన్న ప్రకటించిన రజనీకాంత్.. ఇవాళ మరో అడుగు ముందుకు వేశారు. తనతో కలిసి నడిచేవాళ్లందరినీ ఏకం చేసేందుకు ఓ వెబ్‌సైట్‌ను ప్రారంభించారు. అభిమానులు, మద్దతుదారులు, ప్రజలు "రజనీమంత్రం.ORG"లో చేరాలని పిలుపిచ్చారు. ఈ వెబ్‌సైట్‌తోపాటు గూగుల్ ప్లే స్టోర్‌లో ఓ ఆండ్రాయిడ్ యాప్‌ను అందుబాటులోకి తెచ్చారు. తన పొలిటికల్ ఎంట్రీకి మద్దతిచ్చిన అభిమానులకు ప్రత్యేకంగా ధన్యవాదాలు తెలిపారు. త్వరలోనే పార్టీ నిర్మాణానికి సంబంధించి మరికొన్ని కీలక ప్రకటనలు చేస్తారని కూడా తెలుస్తోంది. ఆయన పెట్టబోయే పార్టీ పేరు ఏంటన్న దానిపై కూడా రకరకాల ఊహాగానాలు వస్తున్నాయి. సంక్రాంతికి పార్టీ పేరు ప్రకటిస్తారని తెలుస్తోంది. అభిమానులే తనకు అండ అని చెప్తున్న రజనీ.. అమీతుమీ తేల్చుకునేందుకే తాను పాలిటిక్స్‌లోకి వచ్చానంటున్నారు. నిన్న పొలిటికల్ ఎంట్రీపై క్లారిటీ ఇస్తూనే రజినీ కొన్ని కీలక వ్యాఖ్యలు కూడా చేశారు. ప్రస్తుత రాజకీయాల్ని ప్రక్షాళన చేయాలని ఆవేశంగా వ్యాఖ్యానించారు. ఇక ఇప్పుడు రజనీ వెబ్‌సైట్ లాంఛ్‌తో అభిమానుల్లో కొత్త ఉత్సాహం కనిపిస్తోంది. లక్షలాదిమంది మెంబర్లుగా చేరి మేముసైతే అంటూ రజనీకి మద్దతు పలుకుతున్నారు.