రియాద్ : రెండు ముక్కలుగా తెగిపోయిన చేతిని అద్భుతమైన శస్త్రచికిత్స ద్వారా తిరిగి యధాతధంగా కలిపి అపర బ్రహ్మలుగా సౌదీఅరేబియా వైద్యులు అందరి ప్రశంసలు పొందుతున్నారు. ఆసియాకు చెందిన ఓ కార్మికుడు సౌదీలో పనిచేస్తుండగా ఆ వ్యక్తి చెయ్యి రెండు ముక్కలుగా తెగిపడింది. మణికట్టు దిగువన చెయ్యి పూర్తిగా తెగిపోయింది. బాధితుడిని సౌదీ తూర్పు ప్రావిన్స్‌లోని ఖోబర్‌లోని కింగ్ ఫహద్ యూనివర్సిటీ హాస్పిటల్ కు శుక్రవారం తరలించారు. అక్కడ నిపుణులైన వైద్యులు దాదాపు 6 గంటలపాటు శస్త్రచికిత్స నిర్వహించి విజయవంతంగా చేతిని రెండుగా అతికించినట్లు  హాస్పిటల్ డైరెక్టర్ మొహమ్మద్ షహ్రనీ తెలిపారు. తమ ఆసుపత్రిలో  అత్యాధునికమైన సౌకర్యాలు, వైద్యుల నైపుణ్యం, వారి ఏకాగ్రత, పట్టుదలే ఈ ఆపరేషన్ విజయవంతానికి ముఖ్య కారణమని ఆయన తెలిపారు.