సిరియాకు మద్దతుగా ఉండే.. శక్తిమంతమైన.. అత్యాధునిక క్షిపణులతో స్వాగతం పలుకుతామంటూ రష్యాను ఘాటుగా హెచ్చరించారు అమెరికా అధ్యక్షుడు డొనాల్డ్ ట్రంప్‌. విష వాయువులు చిమ్ముతూ.. ప్రజల్ని, పిల్లల్ని చంపుతున్న దుర్మార్గపు శక్తులకు అండగా ఉండవద్దంటూ వార్నింగ్‌ ఇచ్చారు. అమెరికా, రష్యాల మధ్య సంబంధాలు రోజు రోజుకూ దిగజారుతున్న నేపథ్యంలో ట్రంప్‌ చేసిన హెచ్చరికలు కలకలం రేపుతున్నాయి.  సిరియాపై క్షిపణి దాడులను కొనసాగిస్తామంటూ ట్రంప్‌ స్పష్టం చేసినట్లయ్యింది. అయితే.. ఢీ అంటే ఢీ అన్నట్లుగా వ్యవహరిస్తున్న రష్యా అధ్యక్షుడు పుతిన్‌ దీనిపై ఎలా స్పందిస్తారన్నది ఉత్కంఠ కలిగిస్తోంది. 

 సిరియాలో జరుగుతున్న మారణకాండకు మద్దతు ఇస్తున్న రష్యా.. దీన్ని అడ్డుకోవడానికి ప్రయత్నిస్తున్న అమెరికాకూ వ్యతిరేకంగా మాట్లాడుతోంది. ఈ నేపథ్యంలో ట్రంప్‌ చేసిన వ్యాఖ్యలు.. అమెరికా.. రష్యా మధ్య సాగుతున్న ప్రచ్ఛన్న యుద్ధాన్ని మరింత తీవ్రం చేసే అవకాశాలు కనిపిస్తున్నాయి. అటు స్టాక్‌ మార్కెట్లపైనా దీని ప్రభావం పడుతుందేమోనని అంతర్జాతీయ ఇన్వెస్టర్లు తీవ్ర ఆందోళన చెందుతున్నారు.