బీజింగ్: ఎయిర్ చైనా విమానంలో ఓ ప్రయాణికుడు ఓ పెన్నుతో చేసిన హంగామా.. అధికారులకు ముచ్చెమటలు పట్టించింది. చాంగ్షా నుంచి బీజింగ్ వెళ్లాల్సిన ఈ విమానంలో ఓ ప్రయాణికుడు ఓ ఫౌంటేన్ పెన్ను సాయంతో ైఫ్లెట్ అటెండెంట్‌ను బందీగా చేసుకున్నాడు. దీంతో బీజింగ్ వెళ్లాల్సిన ఆ విమానాన్ని మధ్య చైనాలోని ఝెంగ్ఝౌ సిటీకి తరలించారు. ఉదయం 8.40 గంటలకు చాంగ్షా నుంచి టేకాఫ్ అయిన ఈ విమానం 11 గంటలకు బీజింగ్ చేరాల్సి ఉంది. ఈ ఘటనతో పది గంటల సమయంలో ఝెంగ్ఝౌ ఎయిర్‌పోర్ట్‌లో ఎమర్జెన్సీ ల్యాండింగ్ చేశారు. అందులో ఉన్న ప్రయాణికులందరినీ ఎలాంటి హాని కలగకుండా కిందికి దించేసినట్లు సివిల్ ఏవియేషన్ అథారిటీ ఆఫ్ చైనా వెల్లడించింది. మధ్యాహ్నం 1.17 గంటల కల్లా ఈ ఆపరేషన్ పూర్తయినట్లు వివరించింది. అయితే ఆ అగంతకుడి వివరాలు మాత్రం చెప్పలేదు. అయితే విమానం హైజాక్ అవుతుందేమో అన్న భయంతో ఎయిర్‌పోర్ట్‌లో వందల కొద్దీ పారామిలిటరీ పోలీసులను రంగంలోకి దింపారు. కొన్ని అంబులెన్స్‌లను కూడా ఎయిర్‌పోర్ట్ దగ్గర ముందు జాగ్రత్త చర్యగా ఉంచారు. ఈ విమానంలోని ప్రయాణికులను మరో విమానంలో బీజింగ్‌కు పంపిస్తామని ఝెంగ్ఝౌ ఎయిర్‌పోర్ట్ అధికారులు చెప్పారు.