మస్కట్: తపాలా సేవల అభివృద్ధిలో ఒమన్ మరో ఘనత సాధించింది. యూనివర్సల్ పోస్టల్ యూనియన్ (UPU) విడుదల చేసిన 2026 పోస్టల్ డెవలప్‌మెంట్ ఇండెక్స్‌లో ప్రాంతీయంగా వరుసగా రెండో ఏడాది మొదటి స్థానాన్ని దక్కించుకుంది. అంతేకాకుండా, ‘రీజినల్ లీడర్‌షిప్’ అవార్డును కూడా గెలుచుకుంది.

పోస్టల్ రంగంలో సేవల సామర్థ్యాన్ని పెంచడం, వాటిని ప్రజలకు మరింత చేరువ చేయడం వంటి చర్యలకు ఈ గుర్తింపు లభించింది. ఒమన్ రవాణా, సమాచార, కమ్యూనికేషన్ టెక్నాలజీ మంత్రిత్వ శాఖ ఆధ్వర్యంలో అక్టోబర్ 9న ప్రపంచ పోస్టల్ దినోత్సవాన్ని కూడా నిర్వహించింది. ఈ ఏడాది ‘వన్ పోస్టల్ నెట్‌వర్క్, ఎండ్‌లెస్ పొటెన్షియల్’ (ఒకే తపాలా నెట్‌వర్క్‌.. అపార అవకాశాలు) అనే థీమ్‌తో కార్యక్రమాలు చేపట్టారు.

610 నుంచి 704కు పెరిగిన కేంద్రాలు

దేశవ్యాప్తంగా తపాలా కార్యాలయాలు, పోస్టల్ సేవలు అందించే కేంద్రాల సంఖ్య గణనీయంగా పెరిగింది. 2024లో 610గా ఉన్న ఈ కేంద్రాల సంఖ్య 2025 నాటికి 704కు చేరింది. దీంతో వివిధ ప్రాంతాల్లోని ప్రజలకు పోస్టల్ సేవలు మరింత సులభంగా అందుబాటులోకి వచ్చాయి. గవర్నరేట్ల వారీగా పరిశీలిస్తే మస్కట్‌లో అత్యధికంగా 107 పోస్టల్ సేవా కేంద్రాలు ఉన్నాయి. ధోఫర్‌లో 50, అల్ బతీనా నార్త్ గవర్నరేట్‌లో 39 కేంద్రాలు ఉన్నాయి.

ఎక్స్‌ప్రెస్ మెయిల్ సేవల్లో 26 శాతం వృద్ధి

ఒమన్‌లో దేశీయ ఎక్స్‌ప్రెస్ మెయిల్ సేవలు కూడా గణనీయంగా విస్తరించాయి. 2025లో ఈ సేవల్లో 26 శాతం వృద్ధి నమోదైంది. మొత్తం 43.8 లక్షలకు పైగా మెయిల్ వస్తువులను ప్రాసెస్ చేశారు. అదే సమయంలో విదేశాల నుంచి వచ్చిన 30 లక్షలకు పైగా పార్సిళ్లను కూడా ప్రాసెస్ చేశారు. ఆన్‌లైన్ వాణిజ్యం, రవాణా, లాజిస్టిక్స్ రంగాల్లో పెరుగుతున్న అవసరాలకు అనుగుణంగా పోస్టల్ సేవలకు డిమాండ్ పెరుగుతున్నట్లు ఈ గణాంకాలు సూచిస్తున్నాయి.

సేవల విస్తరణతో ప్రజలకు ప్రయోజనం

పోస్టల్ కార్యాలయాలు, సేవా కేంద్రాల సంఖ్య పెరగడం వల్ల దేశంలోని అన్ని గవర్నరేట్లలో ప్రజలకు సేవలు మరింత అందుబాటులోకి వస్తున్నాయి. దేశీయ, అంతర్జాతీయ పార్సిళ్ల నిర్వహణలోనూ పోస్టల్ నెట్‌వర్క్ కీలక పాత్ర పోషిస్తోంది. పోస్టల్ రంగంలో నిరంతర అభివృద్ధి, సేవల విస్తరణతో ప్రాంతీయంగా ఒమన్ తన స్థానాన్ని మరింత బలోపేతం చేసుకుందని గణాంకాలు వెల్లడించాయి.