సరైన ఎంట్రీ వీసా దొరక్కపోవడంతో, ఓ వ్యక్తి అక్రమంగా బహ్రెయిన్‌లోకి వుడెన్‌ కంటెయినర్‌ ద్వారా ప్రవేశించిన ఘటన ఆలస్యంగా వెలుగు చూసింది. ముహర్రాక్‌లో బెగ్గర్స్‌కి వ్యతిరేకంగా పోలీసులు చేపట్టిన ఆపరేషన్‌ సందర్భంగా ఈ విషయం బయటకు వచ్చింది. ఆసియాకి చెందిన 45 ఏళ్ళ వ్యక్తి, బహ్రెయిన్‌లోకి తానెలా అక్రమంగా ప్రవేశించిందీ పోలీసుల అరెస్ట్‌ అనంతరం జరిగిన విచారణలో వెల్లడించాడు. చేసుకోవడానికి పని కావాలంటూ కార్లలో వెళుతున్నవారిని ఆపి అడుగుతుండగా, అతన్ని పోలీసులు గుర్తించారు. ఐడీ కార్డ్‌ చూపించమని పోలీసులు అడిగేసరికి, కింగ్‌డమ్‌లోకి తాను అక్రమంగా ప్రవేశించినట్లు అతను సమాధానమిచ్చాడు. తానెలా అక్రమంగా బహ్రెయిన్‌లోకి ప్రవేశించిందీ అతను వివరించేసరికి పోలీసులు ఆశ్చర్యపోయారు.