కువైట్‌ సిటీ: స్టేట్‌ సెక్యూరిటీ అలాగే జనరల్‌ డిపార్ట్‌మెంట్‌ ఆఫ్‌ డ్రగ్స్‌ కంట్రోల్‌ అత్యంత చాకచక్యంగా నిర్వహించిన ఆపరేషన్‌లో కస్టమ్స్‌ అధికారి ఒకరు పట్టుబడ్డారు. ఇరాకీ ట్రక్‌ డ్రైవర్‌ అలాగే బెడౌన్‌ డ్రగ్‌ డీలర్‌కి సహకరించాడనే అభియోగాలు ఆ అధికారిపై మోపబడ్డాయి. అబ్దాలి బోర్డర్‌ పోస్ట్‌ మీదుగా 180 కిలోల డ్రగ్స్‌ (హాషిష్‌)ని తరలించేందుకు కస్టమ్స్‌ అధికారి, నిందితులకు సహకరించాడు. ఇందుకోసం 30,000 కువైటీ దినార్స్‌ లంచం తీసుకున్నట్లు విచారణలో కస్టమ్స్‌ అధికారి అంగీకరించారు. నిందితుడ్ని తదుపరి విచారణ నిమిత్తం పబ్లిక్‌ ప్రాసిక్యూషన్‌కి అప్పగించారు.