బహ్రెయిన్: లోవర్‌ క్రిమినల్‌ కోర్ట్‌ జిసిసి మహిళ ఒకరికి రెండు వారాల జైలు శిక్షను ఖరారు చేసింది. పబ్లిక్‌ అసభ్యతకి పాల్పడినందుకుగాను సదరు మహిళ ఈ జైలు శిక్షకు గురైంది. ఆమెకు సంబంధించిన 50 సెకెన్ల నిడివిగల ఒక వీడియో సోషల్‌ మీడియాలో వైరల్‌ అవడమే దీనికి కారణం. ఆ వీడియోలో నిందితురాలు, కారులో వెళుతూ పెద్ద సౌండ్‌తో డాన్స్‌ చేస్తూ అసభ్యకరంగా ప్రవర్తించింది. ఆ సమయంలో నిందితురాలి బాయ్‌ఫ్రెండ్‌ కారు నడుపుతుండగా, సన్‌ రూఫ్‌ని తెరచి, అందులోంచి పైకి లేచి ఆమె డాన్సులు చేసింది. వీడియో వైరల్‌ కావడంతో పోలీసులు, నిందితురాలితోపాటు ఆమె బాయ్‌ఫ్రెండ్‌ని కూడా అరెస్ట్‌ చేశారు. అరేబియన్‌ పార్టీలో ఎంజాయ్‌ చేశామనీ, అర్థరాత్రి 2 గంటల సమయంలో పార్టీ నుంచి బయటకు వచ్చామనీ, సన్‌ రూఫ్‌ ఓపెన్‌ చేసి, అందులోంచి తాను బయటకు చూసేందుకు ప్రయత్నించానని విచారణలో పేర్కొంది నిందితురాలు.