కన్‌స్ట్రక్షన్‌ వర్కర్‌ ఒకరు తన రూమ్‌ మేట్‌పై హత్యాయత్నానికి పాల్పడిన నేరానికిగాను 10 ఏళ్ళ జైలు శిక్షకు గురయ్యాడు. న్యాయస్థానం నిందితుడికి పదేళ్ళ జైలు శిక్షతోపాటుగా 100,000 దిర్హామ్‌ల జరీమానా కూడా విధించింది. జరీమానా మొత్తాన్ని బాధిత వ్యక్తికి అప్పగించాలని ఆదేశించింది న్యాయస్థానం. గత ఏడాది అబుదాబీలో ఈ ఘటన జరిగింది. వర్కర్స్‌ నివసిస్తున్న అకామడేషన్‌లో చిన్న వాగ్వాదం ఇద్దరు సహచరుల మధ్య గొడవకు దారి తీసింది. ఈ ఘటనలో ఓ వ్యక్తి, మరో వ్యక్తిపై కత్తితో దాడి చేశాడు. ఈ దాడి కారణంగా తీవ్రంగా గాయపడ్డ వ్యక్తి, ఆసుపత్రిలో కొన్ని వారాలపాటు వైద్య చికిత్స పొందాల్సి వచ్చింది. దాడి చేసిన అనంతరం అక్కడినుంచి పారిపోయేందుకు నిందితుడు ప్రయత్నించగా, అది చూసిన మరో కార్మికుడు పారిపోతున్న నిందితుడ్ని పట్టుకున్నారు. కింది కోర్టు ఇచ్చిన తీర్పుని నిందితుడు పై కోర్టులో సవాల్‌ చేయగా, పై కోర్టు కింది కోర్టు తీర్పుని సమర్థించింది.