తమిళ సూపర్ స్టార్ రజనీకాంత్ జెట్ స్పీడ్‌తో దూసుకెళుతున్నారు. త్వరలో పూర్తి రాజకీయాలలోకి వస్తారని భావిస్తున్న రజనీ, తన సినిమాలకి మాత్రం బ్రేక్ వేయడం లేదు. తాజాగా రజనీకాంత్ మురుగదాస్ దర్శకత్వంలో దర్భార్ సినిమా చేశారు. సంక్రాంతి కానుకగా ఈ సినిమా విడుదల కానుంది. మరి కొద్ది రోజులలో శివ దర్శకత్వంలో తన 168వ సినిమాని చేయనున్నాడు రజనీకాంత్‌. డిసెంబర్ లేదా జనవరిలో ఈ ప్రాజెక్ట్ సెట్స్ పైకి వెళ్ళనున్నట్టు తెలుస్తుంది. రజనీకాంత్ 169వ చిత్రంకి సంబంధించి తాజాగా ఓ వార్త కోలీవుడ్‌లో హల్ చల్ చేస్తుంది. రజనీకాంత్ ప్రధాన పాత్రలో తమిళ స్టార్ డైరెక్టర్ గౌతమ్ మీనన్ ఓ చిత్రాన్ని తెరకెక్కించనున్నాడట. ఆయన టేకింగ్ స్టైల్‌తో పాటు కథ కూడా రజనీకి నచ్చడంతో వెంటనే ఈ సినిమాకి గ్రీన్ సిగ్నల్ ఇచ్చారని సమాచారం. వేల్స్ ఫిల్మ్ ఇంటర్నేషనల్ సంస్థ నిర్మించనున్న ఈ సినిమాకి సంబంధించి అధికారిక ప్రకటన విడుదల కావలసి ఉంది. ఇదిలా ఉంటే గౌతమ్ మీనన్.. ప్రముఖ రచయిత గోవింద్ నిహ్లాని రాసిన నవల ఆధారంగా చిత్రం తెరకెక్కించనున్నారని వార్తలు వచ్చాయి. లేడీ ఓరియెంటెడ్ మూవీగా రూపొందనున్న ఈ చిత్రంలో అనుష్క ప్రధాన పాత్ర పోషిస్తుందని చెప్పుకొచ్చారు. ఇందులో ఏది నిజమో తెలియాల్సి ఉంది.