రెండేళ్ళ వీసా బ్యాన్‌ నిబంధన ఒమన్‌ మార్కెట్‌పై తీవ్ర ప్రభావం చూపుతుందని ఛాంబర్‌ ఆఫ్‌ కామర్స్‌ అధికారులు వెల్లడించారు. ఆయిల్‌ ధరల పతనంతో ఒమన్‌ ఆర్థిక వ్యవస్థలో మందగమనం కన్పిస్తోందనీ, ఈ పరిస్థితుల్లో వీసా బ్యాన్‌ మంచిది కాదనే విషయాన్ని ప్రభుత్వం దృష్టికీ, పోలీసుల దృష్టికీ తీసుకెళ్ళినప్పటికీ ప్రయోజనం లేకుండా పోయిందని ఒమన్‌ ఛాంబర్‌ ఆఫ్‌ కామర్స్‌ ప్రతినిథి ఒకరు చెప్పారు. నో అబ్జెక్షన్‌ సర్టిఫికెట్‌ కూడా వలసదారులకు తిరిగి పని పొందే అవకాశాన్ని ఇవ్వకుండా రాయల్‌ ఒమన్‌ పోలీసులు స్పష్టంగా చెప్పడంతో, వలసదారులు నిరుత్సాహంతో ఉన్నారనీ, కొత్త ఉద్యోగాల్లోంచి వారు తొలగించబడ్డారని మార్కెట్‌ వర్గాలు వెల్లడించాయి. పలు కంపెనీలు కూడా ఈ విషయాన్ని ప్రభుత్వం దృష్టికి తీసుకు వెళ్ళాయి. అయితే ఎన్‌ఓసీ సర్టిఫికెట్ల చుట్టూ 'రాకెట్‌' నడుస్తోందనీ, స్కిల్‌ లేని వర్కర్స్‌ నో అబ్జెక్షన్‌ సర్టిఫికెట్‌ని కంపెనీలతో కలిసి మిస్‌ యూజ్‌ చేస్తున్నాయని షురా సభ్యుడు వివరించారు. అస్తమానూ ఉద్యోగాలు మారేవారిని నియంత్రించడానికి ఈ నిబంధన తెచ్చినప్పటికీ, ప్రస్తుత పరిస్థితుల్లో కంపెనీలను ఈ నిర్ణయం ఇబ్బందుల్లోకి నెట్టేస్తుందని, తద్వారా దేశ ఆర్థిక వ్యవస్థకూ ఇబ్బందికరమని కంపెనీ వర్గాలు వివరించాయి.