దక్షిణ భారత సినిమా రంగంలో తొలిసారి జరుగుతున్న ఐఫా ఉత్సవం పురస్కారాల ప్రధానోత్సవానికి సర్వం సిద్ధమైంది. ఈ వేడుకలకు ఆతిథ్యం ఇచ్చేందుకు హైదరాబాద్‌లోని గచ్చిబౌలి ఔట్‌డోర్‌ స్టేడియం సర్వాంగ సుందరంగా ముస్తాబైంది. ఆదివారం, సోమవారం రెండు రోజుల పాటు జరుగనున్న ఈ వేడుకల ద్వార వసూలు చేసిన నిధులతో చెన్నై వరద బాధితులకు సాయం చేయనున్నట్లు నిర్వాహకులు తెలిపారు. ఈ పురస్కారాల ప్రదానోత్సవంలో తెలుగు విభాగానికి నటుడు అల్లు శిరీష్‌, రెజీనా వ్యాఖ్యాతలుగా వ్యవహరించనున్నారు. రామ్‌చరణ్‌, అదాశర్మ, శ్రియ, తాప్సి, తమన్నా, అఖిల్‌ తదితరులు తమ నృత్య ప్రదర్శనలతో ప్రేక్షకులను మైమరపించనున్నారు.