న్యూఢిల్లీ: హోర్ముజ్ జలసంధి దాటుతున్న సమయంలో భారత జెండా కలిగిన రెండు చమురు నౌకల పై దాడి జరిగినట్లు భారత విదేశాంగ మంత్రిత్వ శాఖ ధృవీకరించింది. శనివారం ఈ ఘటన చోటుచేసుకున్నట్లు అధికారిక ప్రకటనలో పేర్కొంది.

చమురు సరుకు తీసుకెళ్తున్న ఈ నౌకలు హోర్ముజ్ జలసంధిని దాటే ప్రయత్నంలో ఉండగా దాడికి గురైనట్లు సమాచారం. ఈ ఘటనపై భారత ప్రభుత్వం ఆందోళన వ్యక్తం చేసింది.

ఈ నేపథ్యంలో, భారత విదేశాంగ మంత్రిత్వ శాఖ ఉన్నతాధికారి ఇరాన్ రాయబారిని పిలిపించి, భారత అభిప్రాయాన్ని తమ ప్రభుత్వానికి తెలియజేయాలని కోరినట్లు తెలిపింది. అలాగే హోర్ముజ్ జలసంధి ద్వారా భారతానికి వస్తున్న నౌకల రాకపోకలను త్వరితగతిన సురక్షితంగా పునరుద్ధరించాలని విజ్ఞప్తి చేసినట్లు వెల్లడించింది.

ప్రపంచ చమురు సరఫరాలో కీలకమైన హోర్ముజ్ జలసంధిలో ఈ ఘటన చోటుచేసుకోవడం అంతర్జాతీయ స్థాయిలో ఆందోళనకు దారి తీసింది. నౌకాయాన భద్రత, ఇంధన సరఫరాలపై దీని ప్రభావం ఉండే అవకాశం ఉందని నిపుణులు భావిస్తున్నారు.