విలక్షణ నటనకు మారుపేరైన కమల్‌హాసన్‌ ప్రఖ్యాత హార్వర్డ్‌ యూనివర్సిటీలో నిర్వహించే భారతీయ సదస్సులో ప్రసంగించనున్నారు. ఫిబ్రవరి 6, 7 తేదీల్లో అమెరికాలోని ప్రఖ్యాత హార్వర్డ్‌ విశ్వవిద్యాలయంలో 13వ భారత వార్షిక సదస్సు నిర్వహించనున్నారు. 'భారత్‌ పరిణామక్రమం: అవకాశాలు, అవరోధాలు'అనే అంశంపై సదస్సు జరగనుంది. కేంద్ర సమాచార, సాంకేతిక శాఖ మంత్రి రవిశంకర్‌ప్రసాద్‌, కాంగ్రెస్‌ నేత శశిథరూర్‌, బాలీవుడ్‌ దర్శకుడు కరణ్‌జోహార్‌ ఈ కార్యక్రమానికి ముఖ్య అతిథులుగా హాజరుకానున్నారు. అంతర్జాతీయ వ్యాపారవేత్తలు, ఎంటర్‌టైన్‌మెంట్‌ నిపుణులు, ప్రభుత్వ అధికారులు, మేధావులు ఈ సదస్సులో పాల్గొంటారు.