దుబాయ్: అల్ మమ్జార్ క్రీక్‌లో ప్రమాదవశాత్తు సముద్రంలోకి దూసుకెళ్లిన కారును దుబాయ్ పోలీసుల రెస్క్యూ టీమ్ బయటకు తీసింది.

దుబాయ్ పోలీసుల మారిటైమ్ రెస్క్యూ డివిజన్ డైరెక్టర్ లెఫ్టినెంట్-కల్నల్ అలీ అబ్దుల్లా అల్ ఖాసిబ్ అల్ నక్బీ కధనం ప్రకారం, కారు నడుపుతున్న 41 ఏళ్ల అరబ్ మహిళ బీచ్ దగ్గర పార్కింగ్ స్థలంలో ఉండగా తన ఫోన్ ద్వారా చేదు వార్తను విన్నవెంటనే కంగారులో పొరపాటుగా యాక్సిలరేటర్ నొక్కటం జరిగింది. ఆ కంగారులో ఆమె హ్యాండ్ బ్రేక్ ఉపయోగించడం మర్చిపోయింది. దాంతో కారు సముద్రంలోకి దూసుకెళ్లింది. తేరుకున్న ఆమె వెంటనే నీటిలో పడిపోయే ముందు కారు నుండి దిగిపోవటంతో ఎటువంటి గాయాలు పాలవ్వకుండా సురక్షితంగా బయటపడింది. ఈ సంఘటన గురించి ఆమె దుబాయ్ పోలీసులకు నివేదించగా, సముద్రం లోపలకు 30 మీటర్లు వెళ్ళిన కారును సహాయక బృందాలు ఒడ్డుకు చేర్చాయి.

అల్ నక్బీ వాహనదారులందరినీ అప్రమత్తంగా ఉండాలని, వారి స్వంత భద్రత కోసం మరియు ఇతరుల భద్రత కోసం డ్రైవింగ్ చేసేటప్పుడు శ్రద్ధ వహించాలని పిలుపునిచ్చారు.