మనామా:సరైనా వీసాలు కలిగి ఉన్న ప్రవాసీయులు ఇక బహ్రెయిన్ లోకి వచ్చేందుకు ఎలాంటి ముందస్తు అనుమతి అవసరం లేదని ఆ దేశ ప్రభుత్వం స్పష్టం చేసింది. ఈ నిర్ణయం బుధవారం నుంచే అమలులోకి వచ్చినట్లు బహ్రెయిన్ నేషనాలిటి, పాస్ పోర్టు, రెసిడెన్సీ వ్యవహారాల విభాగం అధికారులు వెల్లడించారు. ఈ నిర్ణయంతో చెల్లుబాటులో ఉన్న వీసాదారులు నిరభ్యంతరంగా తిరిగి బహ్రెయిన్ చేరుకునేందుకు మార్గం సుగమమైంది. అయితే..ఈ నిర్ణయం తక్షణ వీసాలు పొందాలనుకునే వారికి మాత్రం వర్తించదు. తక్షణ వీసాలపై బహ్రెయిన్ చేరుకునే వారికి ప్రస్తుతం అనుమతి లేదని, తదుపరి నోటీస్ వచ్చే వరకు ఇదే విధానం అమలులో ఉంటుందని స్పష్టం చేశారు అధికారులు. అంతేకాదు..విదేశీ నివాసితులకు, బహ్రెయిన్ సందర్శకులకు ముందస్తు అనుమతి ఇస్తూ జారీ చేసిన లేఖను కూడా రద్దు చేసినట్లు ప్రకటించారు.