బహ్రెయిన్‌లో నేటినుంచి న్యూ పాయింట్స్‌ సిస్టమ్‌ ట్రాఫిక్‌ ఉల్లంఘనలకు సంబంధించి అమల్లోకి వచ్చింది. అధికారిక వర్గాలు దీనిపై నిన్ననే స్పష్టమైన ప్రకటన చేశారు. ట్రాఫిక్‌ ఉల్లంఘనల్ని ఎట్టి పరిస్థితుల్లోనూ ఉపేక్షించేది లేదనీ, కఠిన చర్యలు తప్పవు గనుక ప్రతి ఒక్కరూ రోడ్లపై బాధ్యతాయుతంగా వాహనాలు నడపాలని జనరల్‌ డైరెక్టరేట్‌ ఆఫ్‌ ట్రాఫిక్‌ డైరెక్టర్‌ జనరల్‌ షేక్‌ నాజర్‌ బిన్‌ అబ్దుల్‌ రహ్మాన్‌ అల్‌ ఖలీఫా చెప్పారు. ఏడాది కాలానికిగాను అంటే 365 రోజులకు నిబంధనల ఉల్లంఘన పాయింట్లు 20గా నిర్ణయించారు. ఈ పాయింట్లను ఎవరైనా అధిగమిస్తే, అలాంటివారి లైసెన్స్‌ రద్దు చేయబడుతుంది. తొలి ఉల్లంఘన నుంచే కొత్త ఏడాది ప్రారంభమవుతుంది. తొలిసారి 20 పాయింట్లను అధిగమించిన తర్వాత 3 నెలలపాటు డ్రైవింగ్‌ లైసెన్స్‌ రద్దు చేయబడుతుంది. రెండోసారి కూడా 20 పాయింట్లను దాటేసినట్లయితే 6 నెలలపాటు డ్రైవింగ్‌ లైసెన్స్‌ రద్దవుతుంది. లైసెన్స్‌ లేకుండా వాహనాన్ని నడపడం, వాహనానికి సంబంధించినది కాకుండా వేరే లైసెన్స్‌తో ఏదైనా వాహనాన్ని నడపడం, తప్పు పద్ధతిలో ఓవర్‌టేకింగ్‌ చేయడం, ఒకరు లేదా అంతకు మించిన వ్యక్తులను రోడ్డు ప్రమాదంలో గాయపర్చడం, అధికారిక మరియు అత్యవసర వాహనాలకు దారి ఇవ్వకపోవడం లాంటి నిబంధనలు ఉల్లంఘించినప్పుడు, పలు రకాలుగా పాయింట్లను లెక్కిస్తారు.