సౌదీ: 90 జాతీయ దినోత్సవానికి వైభవంగా నిర్వహించేందుకు సిద్ధమవుతున్న సౌదీ అరేబియా..జాతీయ పతాకం విషయంలోనూ ఎలాంటి అవాంఛనీయ ఘటనలకు తావు లేకుండా జాగ్రత్తలు తీసుకుంటోంది. జాతీయ దినోత్సం సందర్భంగా జాతీయ పతాకావిష్కరణలో ఎవరూ పొరపాట్లు చేయకుండా అలాగే పతాకాన్ని అవమానించకుండా సౌదీ ప్రాసిక్యూషన్ అథారిటీ ముందస్తు సూచనలు చేసింది. జాతీయ పతాకం ఆకు పచ్చరంగులో ఉండి తెలుపు ఏకధర్మవాద సూక్తి ఉంటుందని, దాని కింద తెలుపు రంగులో ఉండే కత్తి ఉంటుందని పతాక విశిష్టతను వివరించింది. అందుకే జెండాను సగం ఎత్తులో ఎగరేయకూడదని హెచ్చరించింది. ఇక జాతీయ పతాకాన్ని కింద పడేసినా, నాశనం చేసినా, కించపరిచేలా వ్యవహరించినా తీవ్ర నేరంగా పరిగణించబడుతుంది. అలాగే రాయల్ ఫ్లాగ్ తో పాటు సౌదీ జాతీయ జిహ్నం విషయంలోనూ ఇవే నిబంధనలు వర్తిస్తాయి. జాతీయ పతాకాన్ని అవమానిస్తే..నిందితుడికి ఏడాది జైలు శిక్ష, 3,000 రియాల్స్ ఫైన్ విధిస్తారు. కొన్నిసార్లు జైలు శిక్ష, జరిమానా రెండూ విధిస్తారు. అంతేకాదు సౌదీకి స్నేహపూర్వకంగా ఉండే దేశాల జాతీయ పతాకాలను అవమానించినా శిక్ష తప్పదని ప్రాసిక్యూషన్ అథారిటీ హెచ్చరించింది.