దుబాయ్:కోవిడ్ నిర్ధారణ పరీక్షల కోసం ఇక ఆస్పత్రులు, ల్యాబ్ ల చుట్టు తిరగాల్సిన అవసరం లేకుండా చర్యలు తీసుకుంది దుబాయ్ ఆరోగ్య శాఖ. ప్రయాణికులు, ఇతర అవసరాల కోసం మెడికల్ ప్రూఫ్ గా పీసీఆర్ టెస్ట్ తప్పనిసరి అయిన వారు ఇక నుంచి దుబాయ్ షాపింగ్ మాల్స్ లోనే కోవిడ్ నిర్ధారణ పరీక్షలు చేయించుకోవచ్చు. దుబాయ్ లోని మూడు షాపింగ్ మాల్స్ లో ఈ వెసులుబాటు కల్పించారు. మాల్ ఆఫ్ ది ఎమిరాతి, మిర్దిఫ్ సిటీ సెంటర్, దైరా సిటీ సెంటర్ లో ఏర్పాటు చేసిన పీసీఆర్ టెస్ట్ సెంటర్స్ లో వారంలో ఏ రోజైనా ఉదయం 11 గంటల నుంచి సాయంత్రం 6 గంటల వరకు Dh150 చెల్లించి కోవిడ్ నిర్ధారణ పరీక్షలు చేయించుకోవచ్చు. టెస్ట్ చేయించుకునేవారు దుబాయ్ హెల్త్ అథారిటీ టోల్ ఫ్రీ నెంబర్  800DHA (800342)కి కాల్ చేసి ముందుగా బుకింగ్ చేసుకోవాల్సి ఉంటుంది.  అయితే..జ్వరం ఉన్నా..ఇతర కోవిడ్ లక్షణాలు ఉన్నా షాపింగ్ మాల్స్ లో ఏర్పాటు చేసిన పరీక్ష కేంద్రాల్లో టెస్ట్ చేయించుకునేందుకు అనుమతించరు. షాపింగ్ మాల్స్ లో ఏర్పాటు చేసిన కేంద్రాలు కేవలం ప్రయాణం కోసం లేదా తమకు కరోనా సోకలేదని మెడికల్ ప్రూఫ్ గా పీఆసీఆర్ టెస్ట్ ఫలితాలు తప్పనిసరి అయినవారికి మాత్రమే పరీక్షలు నిర్వహిస్తారు. ఒక్కో టెస్ట్ సెంటర్ లో రోజుకు 180 మందికి పరీక్షలు నిర్వహిస్తారు. 24 గంటల్లోగా రిపోర్ట్ ఇస్తారు. అత్యవసరంగా ప్రయాణం చేసేవారికి దుబాయ్ షాపింగ్ మాల్స్ లో ఏర్పాటు చేసిన కోవిడ్ నిర్ధారణ పరీక్ష కేంద్రాలు ఎంతో ప్రయోజనకరంగా ఉండనున్నాయి.