న్యూఢిల్లీ: కోవిడ్ కారణంగా చెరువులు, నదీ ప్రాంతాల వంటి బహిరంగ ప్రదేశాల్లో ఛాత్ పూజలు జరపరాదంటూ ఢిల్లీ ప్రభుత్వం విధించిన నిషేధంపై జోక్యం చేసుకునేందుకు ఢిల్లీ హైకోర్టు బుధవారంనాడు నిరాకరించింది. ఈనెల 20న బహిరంగ ప్రదేశాల్లో ఛాత్ పూజలకు అనుమతించేది లేదంటూ ఢిల్లీ డిజాస్టర్ మేనేజిమెంట్ అథారిటీ (డీడీఎంఏ) చైర్మన్ ఇచ్చిన ఉత్తర్వును సవాలు చేస్తూ వేసిన పిటిషన్‌ను హైకోర్టు కొట్టివేసింది. జనమంతా ఒక చోట గుమిగూడటానికి అనుమతించడం వల్ల ఇన్‌ఫెక్షన్ వేగంగా వ్యాపిస్తుందని, డీడీఎంసీ ఉత్తర్వును సవాలు చేస్తూ వేసిన పిటిషన్ విచారణకు అర్హత లేదని భావిస్తూ కొట్టివేస్తున్నట్టు న్యాయమూర్తులు హైమ కోహ్లి, సుబ్రమణియం ప్రసాద్‌తో కూడిన బెంచ్ స్పష్టం చేసింది.