అమెరికా అంతరిక్ష పరిశోధనా సంస్థ నాసాలో ఖాళీగా ఉన్న వ్యోమగామి పోస్టులు భర్తీ చేపట్టనున్నారు. ఇందుకోసం వ్యోమగాములు రికార్డు స్థాయిలో దరఖాస్తు చేసుకున్నారు. ఏకంగా 18,300 మంది దరఖాస్తు చేసుకున్నారు. చివరిసారిగా 2012లో పిలిచినప్పుడు వచ్చిన దరఖాస్తులకు ఇది మూడు రెట్లు అధికం. 1978లో 8 వేల మంది స్పందించారు. ఇప్పటివరకూ అదే రికార్డు. తాజాగా అది బద్దలైందని నాసా అధికారులు వెల్లడించారు. 'విభిన్న నేపథ్యాలున్న ఇంత మంది దరఖాస్తు చేసుకోవడం నాకేమీ ఆశ్చర్యాన్ని కలిగించలేదు. ప్రతిపాదిత అంగారక యాత్ర కోసం వారు కూడా తమ వంతు పాత్ర పోషించాలనుకుంటున్నారు' అని నాసా అధిపతి చార్లీ బోల్డెన్‌ తెలిపారు. ప్రస్తుతం దరఖాస్తు చేసుకున్నవారిలో 8 నుంచి 14 మంది మాత్రమే శిక్షణకు ఎంపికవుతారు.
ఇది వచ్చే ఏడాది మధ్య నాటికి పూర్తవుతుందన్నారు. 2011లో అంతరిక్ష షటిల్‌ కార్యక్రమానికి వీడ్కోలు పలికినప్పటి నుంచి అమెరికా వద్ద సొంతంగా మానవ సహిత యాత్రలు చేపట్టే వ్యోమనౌకలు లేవు. రష్యా మీదే ఆధారపడుతోంది. దీంతో ప్రస్తుతం వ్యోమగాముల సంఖ్య 47కు పడిపోయింది. షటిల్‌ యాత్రలు జోరుగా సాగుతున్నప్పుడు 2000 సంవత్సరంలో 149 మంది వ్యోమగాములు నాసాలో పనిచేశారు.