రియాద్:సౌదీ అరేబియా మహిళలకు మరో గుడ్ న్యూస్. పేరు మార్చుకోవాలనుకుంటున్న మహిళలకు ఇక ఎవరి అనుమతి అవసరం లేదు. పేరు మార్చుకోవాలంటే ఇకపై గార్డియన్ సిఫార్సు లేకుండా వారే సొంతంగా ప్రభుత్వానికి దరఖాస్తు చేసుకుంటే సరిపోతుందని పౌర వ్యవహారాల మంత్రిత్వ శాఖ స్పష్టం చేసింది. సంబంధిత అధికారిక వెబ్ సైట్ ద్వారా మహిళలు దరఖాస్తు చేసుకోవచ్చు. అంతర్గత మంత్రిత్వ శాఖ కొత్త మార్గదర్శకాల మేరకు ఓ వ్యక్తి తమ మొదటి పేరును మార్చుకునే వయసును 15 సంవత్సరాల నుంచి 18 సంవత్సరాలకు పెంచింది. నిబంధనల మేరకు తొలిసారి పేరు మార్పు కోసమే దరఖాస్తు చేసుకోవాల్సి ఉంటుంది. లేదంటే పాత పేరునే కొనసాగించాల్సి ఉంటుంది. ఇక కొత్త సవరణల ప్రకారం 18 ఏళ్లలోపు వయసు వారి పేర్లను మార్చాలంటే వారి తల్లిదండ్రులు, సంరక్షకులు, పవర్ ఆఫ్ అటార్నీ కలిగినవారి ద్వారా దరఖాస్తు చేసుకోవాల్సి ఉంటుంది.