దుబాయ్:అల్ ఖోజ్‌లోని ఓ స్కూల్ రవాణా సర్వీసు కంపెనీ సంయుక్తంగా 1 మిలియన్ డాలర్లను దుబాయ్ డ్యూటీ ఫ్రీ మిలీనియం డ్రాలో గెలుచుకుంది. దుబాయ్ డ్యూటీ ఫ్రీ టెన్నిస్ ఛాంపియన్‌షిప్ పురుషుల ఫైనల్ మ్యాచ్ అనంతరం ఈ డ్రా జరిగింది. రష్యా టెన్నిస్ ప్లేయర్ అలాగే టోర్నమెంట్ ఛాంపియన్ అయిన అస్లాన్ కరాట్సేవ్ ఈ డ్రా తీశారు. అతనికి ఇదే తొలి దుబాయ్ టైటిల్. కాగా, విన్నింగ్ టికెట్ 34 ఏళ్ళ భారత జాతీయుడు రాహుల్ కోవితాల తజెవెట్టిల్ పేరుతో వుంది. 12 ఏళ్ళుగా రాహుల్ సీనియర్ ఫైనాన్స్ అధికారిగా ట్రాన్స్‌పోర్ట్ కంపెనీలో పనిచేస్తున్నారు. ఆయన, ఆయన సహచరులు గత నాలుగేళ్ళుగా ఈ ప్రమోషన్‌లో భాగమవుతూ వస్తున్నారు. కేరళకు చెందిన రాహుల్, ఈ బహుమతి గెలుచుకున్న 178వ భారతీయుడిగా రికార్డులకెక్కారు. 1999లో మొదలైన ఈ ర్యాఫిల్ లో ఇప్పటిదాకా విజయం సాధించినవారిలో అత్యధికులు భారతీయులే.