వాషింగ్టన్: ఫైజర్ దాని భాగస్వామ్య జర్మన్ కంపెనీ బయోఎన్‌టెక్‌లు తాము అభివృద్ధి చేసిన వ్యాక్సిన్ చిన్నారులకూ సురక్షితమేనని ప్రకటించాయి. ఇదేవిధంగా టీకాను తయారు చేసిన పలు కంపెనీలు చిన్నారులను వైరస్ నుంచి కాపాడేందుకు తమ టీకాలు సురక్షితమని పేర్కొంటున్నాయి. ఆరు నెలల చిన్నారుల విషయంలోనూ తాము రూపొందించిన టీకాలు సమర్థవంతంగా పనిచేస్తాయని చెబుతున్నాయి.

కాగా చిన్నారులు కరోనా బారిన పడితే అది వారికి అత్యంత ప్రమాదకరంగా పరిణమిస్తుందని, అందుకే వారికి టీకాలు వేయడం అవసరమని నిపుణులు చెబుతున్నారు. టీకాలు ఉత్పత్తి చేసిన పలు కంపెనీలు కూడా తమ టీకాలను పిల్లలకు వేసేందుకు ఆయా ప్రభుత్వాల నుంచి అనుమతులను కోరుతున్నాయి. కాగా ఫైజర్, మోడెర్నా కంపెనీలు చిన్నారులపై టీకా ప్రభావాన్నితెలుసుకునేందుకు పరిశోధనలు ప్రారంభించనున్నాయి. ఇందుకు ఆయా కంపెనీలు ప్రభుత్వం నుంచి అనుమతులు కూడా పొందాయి. ఇదేవిధంగా ఆస్ట్రాజెనికా కంపెనీ గత నెలలోనే తమ టీకా చిన్నారులపై ఎలా పనిచేస్తోందో తెలుసుకునేందుకు పరిశోధనలు ప్రారంభించింది.