గల్ఫ్ కు వలస వచ్చిన భారతీయుల విజయ గాధల సమాహారంగా తెరకెక్కుతోన్న చిత్రం 'గల్ఫ్'. పి.సునీల్ కుమార్ రెడ్డి దర్శకత్వంలో యెక్కలి రవీంద్రబాబు ఈ చిత్రాన్ని నిర్మిస్తున్నారు.గల్ఫ్ దేశాల్లో చాలా మందిని కలిసి వారి నుండి సమాచారాన్ని సేకరించడంతో పాటు 500 కేస్ స్టడీస్ తో యదార్ధ  ఘటనల ఆధారంగా ఈ కధ తయారు చేసుకున్నారు. ప్రవీణ్ ఇమ్మడి స్వరపరిచిన ఈ చిత్రానికి సంబంధించిన పాటల్లో ఒక పాటను, టీజర్ ను శనివారం దుబాయ్ లో ఆవిష్కరించారు. గల్ఫ్ వలసల మీద రూపొందిస్తున్న సినిమా కావడంతో దుబాయ్ లోని జజీరా ఎమిరేట్స్ పవర్ అనే ప్రముఖ కంపెనీ కి చెందిన సోనాపూర్ అనే లేబర్ క్యాంపు లో ఈ వేడుక నిర్వహించారు. జజీరా ఎమిరేట్స్ పవర్ మేనేజింగ్ డైరెక్టర్ కిషోర్ బాబు, బీటెక్ కంపెనీ మేనేజింగ్ డైరెక్టర్ శ్రీరాం, గల్ఫ్ లో అడ్వకేట్ గా పనిచేస్తున్న అనురాధ, 'మాగల్ఫ్.కామ్' నిర్వాహకులు శ్రీకాంత్ ఆధ్వర్యంలో దర్శకుడు సునీల్ కుమార్ రెడ్డి ఈ కార్యక్రమాన్ని నిర్వహించారు. ఈ సినిమాలో కధానాయకుడు, నాయికలుగా కొత్తవారు నటిస్తుండగా ఇతర పాత్రల్లో తనికెళ్ళ భరణి, ఎల్.బి.శ్రీరాం, నాగినీడు, జబర్దస్త్ వేణు తదితరులు నటిస్తున్నారు. ఈ చిత్రాన్ని జూలై లో విడుదల చేసే ప్రయత్నంలో ఉన్నామని చెప్పారు దర్శకుడు సునీల్ కుమార్ రెడ్డి. ఈ చిత్రానికి ఛాయాగ్రహణం: ఎస్.వి.శివరాం, సంగీతం: ప్రవీణ్ ఇమ్మడి, ఎగ్జిక్యూటివ్ నిర్మాత: బి.బాపిరాజు.