ఒమన్‌: షాహీన్ తుఫాను కారణంగా దెబ్బతిన్న పచ్చదనాన్ని తిరిగి ఏర్పాటు చేసేందుకు వాలంటీర్లు.. పర్యావరణ అథారిటీ సిబ్బందితో కలిసి కృషి చేస్తున్నారు. ఇందులో భాగంగా
కొట్టుకుపోయిన లేదా దెబ్బతిన్న చెట్లను తిరిగి పూర్వ స్థితికి తెచ్చేందుకు ప్రయత్నాలు చేయనున్నారు. అక్టోబర్ 20, 21వ తేదీలలో పర్యావరణ పునరుద్ధరణ డ్రైవ్ పెద్ద ఎత్తున చేపట్టనున్నారు. "తుఫాను ప్రభావిత ప్రాంతాల్లో దెబ్బతిన్న పచ్చదనాన్ని వాలంటీర్లు, సంబంధిత అధికారులు విస్తృత భాగస్వామ్యంతో తిరిగి తెచ్చేందుకు కృషి చేస్తారు. జీవవైవిధ్యాన్ని సంరక్షించడం, వృక్షసంపదను అభివృద్ధి చేయడం, ఎడారీకరణను తగ్గించడం, దెబ్బతిన్న వృక్షసంపదను పునరుద్ధరించడం లక్ష్యంగా ఈ పర్యావరణ పునరుద్ధరణ డ్రైవ్ సాగనుంది." అని పర్యావరణ అథారిటీ ఒక ప్రకటనలో తెలిపింది. ఈ రెండు రోజుల్లో స్వచ్ఛందంగా పనిచేయాలనుకునే వారి కోసం పర్యావరణ అథారిటీ ఆన్‌లైన్ రిజిస్ట్రేషన్ పోర్టల్‌ను ప్రారంభించింది. ఆసక్తిఉన్నవారు రిజిస్ట్రేషన్ చేసుకొని ఈ పర్యావరణ పునరుద్ధరణ డ్రైవ్ లో పాల్గొనవచ్చు. ఒమానీ సిదర్ సొసైటీ, ఒమన్ ఎన్విరాన్మెంట్ సొసైటీ, ఉత్తర- దక్షిణ అల్ బాటినాలోని పర్యావరణ విభాగాలు సంయుక్తంగా ఈ భారీ పర్యావరణ పునరుద్ధరణ డ్రైవ్ చేపడుతున్నాయి.