రియాద్: సౌదీ అరేబియా, తీవ్రవాద ఘటనల్ని తీవ్రంగా ఖండిస్తామని ప్రకటించింది. ఎట్టిపరిస్థితుల్లోనూ హౌతీ తీవ్రవాదుల దుశ్చర్యల్ని సహించేది లేదనీ, గట్టి గుణపాఠం చెబుతూనే వుంటామని స్పష్టం చేసింది. యునైటెడ్ అరబ్ ఎమిరేట్స్‌లో ఇటీవల జరిగిన హౌతీ దాడిని తీవ్రంగా ఖండించింది సౌదీ అరేబియా. యెమెనీ పార్టీలతో కలిసి శాంతి కోసం చాలా ప్రయత్నాలు చేసినా హౌతీ మిలీషియా మాత్రం తన పంథా వీడటంలేదని సౌదీ అరేబియా అసహనం వ్యక్తం చేసింది. ఈ మేరకు సౌదీ విదేశాంగ మంత్రి ప్రిన్స్ ఫైజల్ బిన్ ఫర్హాన్ కీలక ప్రకటన చేశారు. గల్ఫ్‌లోనే కాక, అంతర్జాతీయ స్థాయిలో శాంతి భద్రతలకు విఘాతం కలిగించేలా హౌతీ మిలీషియా తీరు మారుతోందని ఆ ప్రకటనలో పేర్కొన్నారు. కలిసికట్టుగా తీవ్రవాదాన్ని ఎదుర్కోవాల్సిన అవసరం వుందన్నారాయన.