ఫోన్‌లోనే వాహన చోదక, రిజిస్ట్రేషన్‌ పత్రాలు.. హైదరాబాద్‌: ప్రయాణ సమయంలో వాహనం రిజిస్ట్రేషన్‌ ధ్రువపత్రం(ఆర్సీ), చోదక అనుమతి (డ్రైవింగ్‌ లైసెన్స్‌) వంటి పత్రాలను ఫోన్‌లో డిజిటల్‌ రూపంలో చూపించే వెసులుబాటును వాహనచోదకులకు కల్పించాలని ఆంధ్రప్రదేశ్‌ రవాణాశాఖ సూత్రప్రాయంగా నిర్ణయం తీసుకుంది. దీనికోసం మొబైల్‌ వాలెట్‌ యాప్‌ను తీసుకురానుంది. ఫలితంగా వాహనదారులు ఆయా పత్రాలను ప్రతిసారీ వెంట పెట్టుకుని వెళ్లాల్సిన అవసరం ఉండదు. తనిఖీ అధికారులు అడిగినప్పుడు సెల్‌ఫోన్‌లో యాప్‌ను తెరిచి డిజిటల్‌ పత్రాల్ని చూపిస్తే సరిపోతుంది.దీని కోసం రవాణాశాఖ తీసుకురానున్న ఎం-వాలెట్‌ యాప్‌ను ముందు మొబైల్‌ ఫోన్‌లో డౌన్‌లోడ్‌ చేసుకోవాలి. ఆ తర్వాత వాహనం పత్రాలు, చోదక అనుమతి పత్రాల్ని యాప్‌లో డౌన్‌లోడ్‌ చేసుకోవాల్సి ఉంటుంది. తెలంగాణలో ఇటీవల ఈ సేవలు అందుబాటులోకి వచ్చిన విషయం తెలిసిందే. ఏపీలో యాప్‌ తయారీ, వాహనదారులకు అందుబాటులోకి తేవడానికి కనీసం 3, 4 నెలల సమయం పట్టే అవకాశం ఉంది. ఈ నేపథ్యంలో జూన్‌ తర్వాత ఈ యాప్‌ ప్రజలకు అందుబాటులోకి వచ్చే అవకాశం ఉంది. రవాణాశాఖలో వివిధరకాల సేవల్ని ఆన్‌లైన్‌లో పొందే అవకాశం కల్పించడంపై దృష్టి పెట్టామని, ఇవి ఓ కొలిక్కి రాగానే ఎం-వాలెట్‌ సేవల్ని అందుబాటులోకి తెస్తామని కమిషనర్‌ బాలసుబ్రహ్మణ్యం  తెలిపారు.