అక్కినేని బుల్లోడు నాగ చైతన్య మొదట్నుంచీ మాస్ ఇమేజ్ కోసం ట్రై చేస్తూనే వున్నాడు. కానీ, వర్కవుట్ కావడం లేదు. కెరీర్ తొలి నాళ్లలోనే మాస్ ఇమేజ్‌ని సొంతం చేసుకోవడానికి తెగ వెంపర్లాడాడు. కానీ, ప్రయత్నించిన ప్రతిసారీ ఫెయిలవుతూనే వచ్చాడు.
ఈ మధ్య ‘వెంకీ మామ’, ‘బంగార్రాజు’, ‘లవ్ స్టోరీ’ చిత్రాలతో వరుస హిట్లు కొట్టి చైతూ ఫుల్ స్వింగ్‌లో వున్నాడు. కెరీర్ పీక్స్‌లో వున్న టైమ్‌లోనే ప్రయోగాలు చేస్తే బాగుంటుందని చైతూ భావిస్తున్నాడట. ఆ కోణంలోనే వెంకట్ ప్రభుతో చైతూ చేయబోయే సినిమా మాస్ కంటెంట్‌‌లో వుండబోతోందనీ తెలుస్తోంది.

అలాగే, ‘సర్కారు వారి పాట’ సినిమాతో సూపర్ హిట్ ఇచ్చిన పరశురామ్‌ని చైతూ లైన్‌లో పెట్టిన సంగతి తెలిసిందే. ఈ సినిమా కూడా పక్కా మాస్ బ్యాక్ డ్రాప్‌లోనే వుండబోతోందనీ ఇన్ సైడ్ లీక్.

గతంలో చైతూ, ‘బెజవాడ’ తదితర సినిమాలతో మాస్ ట్రెండ్ ట్రై చేశాడు. బొక్క బోర్లా పడ్డాడు. ఈ సారి అలా కాకుండా జాగ్రత్త పడేందుకు కొన్ని సర్‌ప్రైజింగ్ ట్రిక్స్ ప్లే చేస్తున్నాడట. మేకోవర్‌లో మార్పులతో పాటు, బాడీ లాంగ్వేజ్‌లోనూ కొత్తదనం చూపించేందుకు చైతూ తాపత్రయ పడుతున్నాడట. ఈ సారైనా చైతూ కష్టం ఫలిస్తుందో లేదో చూడాలిక.
మరోవైపు చైతూ నటించిన ‘థాంక్యూ’ మూవీ త్వరలో రిలీజ్‌కి రెడీగా వుంది. రాశీ ఖన్నా ఈ సినిమాలో చైతూకి జోడీగా నటిస్తోంది. అన్నట్లు రాశీఖన్నా, చై జోడీ ‘వెంకీ మామ’ సినిమాలో సందడి చేసిన సంగతి తెలిసిందే.