బహ్రెయిన్: రిఫా ప్రాంతంలో పార్క్ చేసిన కారుకు నిప్పంటించిన నిందితుడిని అరెస్ట్ చేసినట్లు పోలీసులు ప్రకటించారు. నిప్పంటించిన వాహనం పక్కనే పార్క్ చేసిన మరో మూడు కార్లకు కూడా మంటలు అంటుకొని దగ్ధం అయ్యాయని పోలీసులు తెలిపారు. సమాచారం అందగానే ఘటనాస్థలికి చేరుకున్న సివిల్‌ డిఫెన్స్‌ బలగాలు మంటలను అదుపులోకి తీసుకొచ్చాయి. ఈ ప్రమాదంలో ఎవరూ గాయపడలేదు. పబ్లిక్ ప్రాసిక్యూషన్ నేరస్థలాన్ని సందర్శించి పరిశీలించింది.  పోలీసులు ఘటనపై దర్యాప్తు ప్రారంభించారు. ఘటన జరిగిన ప్రాంతంలోని ఇళ్లలోని సీసీటీవీ ఫుటేజీని పరిశీలించారు. సీసీటీవీ ఫుటేజీలో.. ఆగివున్న కారు వద్దకు ఓ వ్యక్తి వస్తూ అందులో ఏదో పోసి నిప్పంటించడం కనిపించింది. విచారణలో నిందితుడు తన నేరాన్ని అంగీకరించాడని పోలీసులు తెలిపారు.