రియాద్: సౌదీ అరేబియాలోని వివిధ సరిహద్దు ప్రాంతాలలో భారీ మాదక ద్రవ్యాలను అక్రమంగా తరలించే ప్రయత్నాలను బోర్డర్ గార్డ్స్ ల్యాండ్ పెట్రోలింగ్ బృందాలు అడ్డుకొని మొత్తం 30 మంది స్మగ్లర్లను అరెస్టు చేశారు. జజాన్, నజ్రాన్, అసిర్‌లోని దక్షిణ ప్రాంతాలు,  టబుక్‌లోని వాయువ్య ప్రాంతం నుండి డ్రగ్స్ ను స్వాధీనం చేసుకున్నారు. స్వాధీనం చేసుకున్న మాదక ద్రవ్యాలలో 1.8 గ్రాముల కొకైన్‌తో పాటు 13 టన్నులకు పైగా ఉద్దీపన ఖాట్, 230 కిలోల హషీష్, 334,000 యాంఫెటమైన్ మాత్రలు, 278 గ్రాముల ఓపియం ఉన్నాయి. అరెస్టయిన స్మగ్లర్లలో 16 మంది సౌదీ పౌరులు, 14 మంది విదేశీయులు ఉన్నారు. విదేశీయులలో  11 మంది ఇథియోపియన్లు, సోమాలి, ఎరిట్రియన్, ఈజిప్షియన్ జాతీయులు ఉన్నారు. అరెస్టు చేసిన స్మగ్లర్లను భద్రతా అధికారులకు అప్పగించినట్లు సరిహద్దు గార్డ్స్ తెలిపారు.