హ్యూమన్‌ రిసోర్సెస్‌ డెవలప్‌మెంట్‌ ఫండ్‌ (హదాఫ్‌) ప్రకారం, ప్రైవేట్‌ సెక్టార్‌లో రిక్రూట్‌మెంట్స్‌ జరిపేటప్పుడు తొలి ప్రాధాన్యత సౌదీలకే ఇవ్వాల్సి ఉంటుంది. సౌదీలు లేనప్పుడే వలసదారులకు అవకాశం దక్కుతుంది. ఈ కొత్త రిక్రూట్‌మెంట్‌కి సంబంధించి ప్రాసెస్‌ లేబర్‌ మినిస్ట్రీకి చెందిన ఎలక్ట్రానిక్‌ నేషనల్‌ గేట్‌కి పంపబడింది. ఫండ్‌ డిప్యూటీ ఎగ్జిక్యూటివ్‌ ఛైర్మన్‌ ఒమర్‌ మిలిబారి చెబుతూ, స్థానికులకే వీలైనన్ని ఎక్కువ ఉద్యోగాలు దక్కేలా ఈ కొత్త విధానం ఉపయోగపడుతుందని అన్నారు. త్వరలోనే ఇది అమల్లోకి వస్తుందని ఆయన వివరించారు. సౌదీ గెజిట్‌ గతంలో వెల్లడించిన వివరాల ప్రకారం, హెచ్‌ఆర్‌ డిపార్ట్‌మెంట్‌లో వలసదారులకు దాదాపుగా ఉద్యోగాలు లేనట్లే. నిబంధనలకు విరుద్ధంగా గనుక వలసదారుల్ని, సౌదీలకు దక్కాల్సిన ఉద్యోగాల్లో నియమిస్తే కఠిన చర్యలు తప్పవు. నిబంధనల్ని అతిక్రమించినవారికి 20,000 సౌది రియాల్స్‌ ఫైన్‌ విధించనున్నారు. అరబిక్‌, ఇస్లామిక్‌ స్టడీస్‌ మరియు సోషల్‌ సైన్సెస్‌ చెప్పే టీచర్ల విషయంలోనూ సౌదీలకే ప్రాధాన్యత ఇవ్వవలసి ఉంటుంది. దీనికి సంబంధించిన గెజిట్‌ మార్చ్‌ 20న వెల్లడయ్యింది.