హైదరాబాద్: పర్యావరణ పరిరక్షణ కార్యకలాపాల దిశగా తన కృషిని బలోపేతం చేస్తూ, GMR హైదరాబాద్ ఇంటర్నేషనల్ ఎయిర్‌పోర్ట్ లిమిటెడ్ (GHIAL) ఇటీవల EV (ఎలక్ట్రిక్ వెహికల్) ఛార్జింగ్ స్టేషన్ మరియు బయో-డీజిల్ ఫిల్లింగ్ స్టేషన్ల ప్రారంభం ద్వారా రెండు సుస్థిర కార్యక్రమాలకు శ్రీకారం చుట్టింది.ఎలక్ట్రిక్ వెహికల్ ఛార్జింగ్ స్టేషన్ మెయిన్ కార్ పార్క్‌లో ఉండగా, బయో-డీజిల్ ఫిల్లింగ్ స్టేషన్ ప్రజా రవాణా కేంద్రం (PTC) వద్ద ఉంది. సుస్థిర వనరుల వినియోగాన్ని పెంపొందించాలని GMR హైదరాబాద్ విమానాశ్రయం లక్ష్యంగా పెట్టుకున్న కార్బన్ న్యూట్రాలిటీ దిశగా ఈ రెండూ ముఖ్యమైన చర్యలు.

ఎలెక్ట్రిక్ ఛార్జింగ్ సేవను పొందాలనుకునే EV వినియోగదారులందరికీ ఈ ఫాస్ట్ ఛార్జింగ్ స్టేషన్ అందుబాటులో ఉంటుంది. 30 KWతో, ఇది ఒక ఫోర్ వీలర్ వాహనాన్ని గంటలో ‘0’ నుండి ‘Full’ ఛార్జ్ చేస్తుంది. ఈ ఛార్జింగ్ స్టేషన్ యాప్ ద్వారా పని చేస్తుంది, మరియు Android, IOS యాప్ మొబైల్ పరికరాల ద్వారా ఉపయోగించడానికి అనుకూలం.

విమానాశ్రయంలో EV ఛార్జింగ్ స్టేషన్ వల్ల ప్రయోజనాలు:

• EV స్టేషన్లను నెలకొల్పడం వల్ల ఎలక్ట్రిక్ వాహనాల వినియోగానికి ప్రోత్సహం లభిస్తుంది.
• ఎలక్ట్రికల్ వాహనాలు కాలుష్యాన్ని నివారిస్తాయి, విమానాశ్రయ ప్రాంగణం చుట్టూ పరిసర శబ్దాలను నియంత్రణలో ఉంచుతాయి.
• విమానాశ్రయ ఎయిర్ క్వాలిటీ ఇండెక్స్ (AQI)ని మరింత మెరుగుపరుస్తుంది.

భారతీయ విమానాశ్రయాలలో మొట్టమొదటిసారిగా, GHIAL విమానాశ్రయంలో బయో-డీజిల్ ఫిల్లింగ్ స్టేషన్‌ను కూడా ప్రారంభించిది. సంప్రదాయ, మార్పు చేయని డీజిల్ ఇంజిన్‌లను కూడా బయోడీజిల్ నడుపుతుంది. బరువు రీత్యా బయోడీజిల్‌లో 11% ఆక్సిజన్ ఉంటుంది. దీనిలో సల్ఫర్ ఉండదు. ఇది దాదాపు 80% తక్కువ CO2 (కార్బన్ డయాక్సైడ్), 100% తక్కువ SO2 (సల్ఫర్ డయాక్సైడ్) ఉద్గారాలను ఉత్పత్తి చేస్తుంది. బయోడీజిల్ వాడకం డీజిల్ ఇంజిన్‌ల జీవితాన్ని పొడిగిస్తుంది ఎందుకంటే ఇది పెట్రోలియం డీజిల్ కంటే మెరుగ్గా లూబ్రికేట్ చేస్తుంది. దీని వల్ల డీజిల్ వినియోగం, ఆటో ఇగ్నిషన్, పవర్ అవుట్‌పుట్ మరియు ఇంజిన్ టార్క్ ప్రభావితం కావు. ఇది ఇంజిన్ గోడలను మరింత మెరుగ్గా శుభ్రపరుస్తుంది.

బయో డీజిల్ వల్ల కలిగే పర్యావరణ ప్రయోజనాలు:  

• బయోడీజిల్‌లు గ్లోబల్ వార్మింగ్ మరియు గ్రీన్‌హౌస్ ప్రభావం ప్రమాదాన్ని తగ్గిస్తాయి.
• కార్బన్ మోనాక్సైడ్ (CO), సల్ఫర్ ఆక్సైడ్ (SO) వంటి ప్రమాదకర వాయువుల విడుదల ఉండదు.ఇది వాహనాల ఇంజన్ జీవితాన్ని కూడా మెరుగుపరుస్తుంది.
• వాయు కాలుష్యాన్ని తగ్గించడం ద్వారా పర్యావరణాన్ని రక్షించడంలో బయోడీజిల్‌లు ముఖ్యమైన పాత్ర పోషిస్తాయి, అందువల్ల పొగమంచు, ఆమ్ల వర్షాలు తగ్గుతాయి.

ప్రదీప్ పణికర్, CEO-GHIAL, “GMR హైదరాబాద్ అంతర్జాతీయ విమానాశ్రయాన్ని సుస్థిర, పర్యావరణ అనుకూల విధానంలో నిర్వహించడానికి మేం కట్టుబడి ఉన్నాము. కేవలం కార్బన్ న్యూట్రాలిటీని సాధించడం మాత్రమే కాకుండా విమానాశ్రయ పర్యావరణ వ్యవస్థ చుట్టూ ఉన్న సహజ వనరులను సమర్థంగా వినియోగించుకోవడం ద్వారా మా భాగస్వాములందరి సహకారంతో అనేక కార్యక్రమాలను చేపడుతున్నాము. జీరో-కార్బన్ ఎమిషన్ ఎయిర్ పోర్టుగా ఉండాలని లక్ష్యంగా పెట్టుకున్న మేం వివిధ పర్యావరణ అనుకూల చర్యలను కొనసాగిస్తాము. కర్బన ఉద్గారాలను తగ్గించడంలో సుస్థిర ఇంధనం ముఖ్యమైన పాత్ర పోషిస్తుంది. అటువంటి ఇంధనం అందుబాటులో ఉండటం విమానాశ్రయం, దాని చుట్టుపక్కల పర్యావరణాన్ని పరిరక్షించడంలో మా ప్రయత్నాలను వేగవంతం చేస్తుంది.’’ అన్నారు.

హైదరాబాద్ అంతర్జాతీయ విమానాశ్రయం సహజ వనరుల సమర్థంగా వినియోగించుకుంటూ, ఉత్తమ వ్యర్థాల నిర్వహణ విధానాలను అవలంబించడం ద్వారా అనేక పర్యావరణ కేంద్రీకృత కార్యక్రమాలను చేపడుతోంది. గ్రీన్ బిల్డింగ్స్, క్లీన్ ఎనర్జీ, కర్బన ఉద్గారాల నియంత్రణ, రీసైక్లింగ్, జల సంరక్షణ, వాననీటి సంరక్షణ, సింగిల్ యూజ్ ప్లాస్టిక్, సోలార్ విద్యుత్ వినియోగం, క్లౌడ్ ఆధారిత నీటిపారుదల నియంత్రణ వ్యవస్థ వాటిలో కొన్ని.GHIAL మొత్తం సోలార్ పవర్ సామర్థ్యం ఇప్పుడు 10 మెగావాట్లకు పెరిగింది.ఈ సోలార్ పవర్ ఉత్పాదనతో, GHIAL యొక్క 50% శక్తి అవసరాలు తీరుతుతున్నాయి. దీని వల్ల దాదాపు 28 లక్షల కిలోల కార్బన్ డయాక్సైడ్ తగ్గుతుంది, ఇది 1.4 లక్షల పూర్తిగా పెరిగిన చెట్లను కాపాడటంతో సమానం.