దుబాయ్: అల్ రఫా పోలీస్ స్టేషన్ పరిధిలోని ట్రేడింగ్ స్టోర్ ముందు పార్క్ చేసిన వాహనాన్ని దొంగిలించిన ఒక వ్యక్తిని దుబాయ్ పోలీసులు రికార్డు సమయంలో అరెస్టు చేశారు. దొంగతనం జరిగినట్లు సమాచారం అందగానే పోలీసులు వెంటనే ఒక బృందాన్ని ఏర్పాటు చేసి ఘటనపై దర్యాప్తు చేపట్టారు. బృందం నిరంతర ఫాలో-అప్ ద్వారా.. దొంగిలించిన వాహనాన్ని గుర్తించి, నేరస్థుడిని దుబాయ్ పోలీసులు అరెస్టు చేశారు. అల్ రఫా పోలీస్ స్టేషన్ యాక్టింగ్ డైరెక్టర్ కల్నల్ ఖలీఫా ఖలీద్ అల్ అవడీ కేసు వివరాలను వెల్లడించారు. ఒక దుకాణం ముందు పార్క్ చేసిన కారు దొంగతనం జరిగిందని పోలీస్ స్టేషన్ కు సమాచారం అందిందన్నారు. వెంటనే కారును వెతకడానికి పెట్రోలింగ్‌ సిబ్బందించి సమాచారం చేరవేశామని, దీంతో రికార్డు సమయంలో వాహనాన్ని గుర్తించి, దొంగను అరెస్ట్ చేసినట్లు ఆయన తెలిపారు. కారును కనిపెట్టి, నేరస్థుడిని పట్టుకున్న సెర్చ్ టీమ్ ను అల్ అవడీ ప్రశంసించారు.