యూఏఈ: త్వరలో యూఏఈలోని ఫార్మసీలలో కొవిడ్-19, ఇన్ ఫ్లూయెంజా వ్యాక్సిన్లు ఇవ్వనున్నారు. ఈ మేరకు ఆరోగ్య, నివారణ మంత్రిత్వ శాఖ (MoHAP) ప్రకటించింది. దేశ ఆరోగ్య అధికారులు నిర్దేశించిన కొన్ని మార్గదర్శకాలకు కట్టుబడి మాత్రమే ఫార్మసీల్లో వ్యాక్సిన్లకు అనుమతించినట్లు పబ్లిక్ హెల్త్ సెక్టార్ అసిస్టెంట్ అండర్ సెక్రటరీ డాక్టర్ హుస్సేన్ అబ్దుల్ రెహ్మాన్ అల్ రాండ్ తెలిపారు. బిజీగా ఉండే పౌరులు, నివాసితులకు ఈ కొత్త సౌకర్యంతో ప్రయోజనం ఉంటుందన్నారు. తమ సమీపంలోని ఫార్మసీకి వెళ్లి అందుబాటులో ఉన్న వ్యాక్సిన్ తీసుకోవచ్చని, ఆయా ఫార్మసీ ప్రకారం ఛార్జీలు ఉంటాయన్నారు. ఇప్పటికే అబుధాబిలో ఈ సర్వీస్ ప్రారంభమైందని, దుబాయ్, ఉత్తర ఎమిరేట్స్‌లో త్వరలో ప్రారంభమవుతుందన్నారు. ఒకే రోజు కొవిడ్, ఫ్లూ (వ్యాక్సిన్) లను తీసుకోవచ్చని ప్రపంచ ఆరోగ్య సంస్థ (డబ్ల్యూహెచ్‌ఓ) ఇటీవల సూచించిందని అల్ రాండ్ తెలిపారు.