యూఏఈ: రద్దీగా ఉండే హైవేకి వ్యతిరేక దిశలో వేగంగా దూసుకెళ్లి మరో అంతర్గత రహదారిపై విన్యాసాలు చేసిన 26 ఏళ్ల గల్ఫ్ దేశస్థుడిని అజ్మాన్ పోలీస్‌లోని ట్రాఫిక్, పెట్రోల్ విభాగం అరెస్టు చేసింది. అతను నిర్లక్ష్యంగా డ్రైవింగ్‌ చేయడం నిఘా కెమెరాల్లో నిక్షిప్తం కావడంతో అధికారులు రెండు గంటల్లోనే అరెస్టు చేశారు. షేక్ మొహమ్మద్ బిన్ జాయెద్ రోడ్డులో ట్రాఫిక్‌కు వ్యతిరేకంగా వాహనదారుడు డ్రైవింగ్ చేస్తున్న వీడియోను పోలీసులు సోషల్ మీడియాలో షేర్ చేశారు.  అజ్మాన్ పోలీస్‌లోని ట్రాఫిక్, పెట్రోల్స్ డిపార్ట్‌మెంట్ డైరెక్టర్ లెఫ్టినెంట్ కల్నల్ సైఫ్ అబ్దుల్లా అల్ ఫలాసి మాట్లాడుతూ.. ఆపరేషన్ రూమ్‌లోని కంట్రోల్ సిస్టమ్స్ నిర్లక్ష్యంగా డ్రైవింగ్ చేసిన డ్రైవర్‌ను గుర్తించి అతనిని ట్రాక్ చేశాయని తెలిపారు. అతని వాహనాన్ని స్వాధీనం చేసుకున్నామని, డ్రైవింగ్ లైసెన్స్‌ను 6 నెలల పాటు సస్పెండ్ చేసినట్లు లెఫ్టినెంట్ కల్నల్ సైఫ్ అల్ ఫలాసీ పేర్కొన్నారు. అతని ప్రాణాలకు, ఇతరుల ప్రాణాలకు లేదా భద్రతకు హాని కలిగించే విధంగా వాహనం నడిపినందుకు అతనికి 2000 దిర్హాంల జరిమానా, ట్రాఫిక్‌కు వ్యతిరేక దిశలో వాహనాన్ని నడిపినందుకు అతనికి Dh600 జరిమానా, ట్రాఫిక్ నిబంధనల ఉల్లంఘనకు Dh500 ఫైన్ విధించినట్లు తెలిపారు.