కువైట్: కువైట్‌లో కురిసిన భారీ వర్షాలకు పలు ప్రాంతాలు జలమయమయ్యాయి. వివిధ గవర్నరేట్‌లలో వర్షం కురిసిన సమయంలో 147 అత్యవసర కాల్స్ ను పరిష్కరించినట్లు కువైట్ ఫైర్ ఫోర్స్ తెలిపింది. అంతర్గత మంత్రి షేక్ తలాల్ ఖలీద్ అల్-అహ్మద్ అల్-సబా, కేఎఫ్ఎఫ్ చీఫ్ లెఫ్టినెంట్ జనరల్ ఖలీద్ రకన్ అల్-మెక్రాద్ అత్యవసర పరిస్థితులను పర్యవేక్షించారు. రోడ్లపై నిలిచిన నీరును తొలగించేందుకు హైడ్రాలిక్ పంపులను వినియోగిస్తున్నట్లు అధికారులు తెలిపారు. ఈ సందర్భంగా ట్రాఫిక్ ప్రమాదాలు,విద్యుత్ ప్రమాదాలు, పడిపోయిన చెట్ల కారణంగా వాహనాలలో చిక్కుకున్న 211 మందిని సురక్షితంగా రక్షించినట్లు తెలిపింది. జహ్రా, ఫర్వానియా, క్యాపిటల్, హవల్లీ గవర్నరేట్‌ల నుండి అత్యధికంగా అత్యవసర కాల్స్ వచ్చాయని పేర్కొంది. కువైట్ సిటీలో 5.8 మిమీ, సాల్మియాలో 6.6 మిమీ, జహ్రాలో 5.6 మిమీ వర్షం కురిసిందని కువైట్ వాతావరణ శాఖ అధికారి అబ్దుల్ అజీజ్ అల్-ఖరావి తెలిపారు. అత్యధికంగా రాబియాలో 24.4 మి.మీ వర్షపాతం నమోదైయినట్లు తెలిపారు. జాబ్రియాలో 10 మిమీ కంటే ఎక్కువ వర్షపాతం కురిసిందన్నారు.