సౌదీ: నిర్లక్ష్యంగా వాహనాన్ని నడిపి ఓ తల్లి, ఆమె ఇద్దరు పిల్లలు గాయపడేందుకు కారణమైన డ్రైవర్‌ను అరెస్టు చేసినట్లు మదీనాలోని జనరల్ డైరెక్టరేట్ ఆఫ్ ట్రాఫిక్ (మురూర్) తెలిపింది. ఈ ఘటనకు సంబంధించిన వీడియో సోషల్ మీడియాలో వైరల్ కావడంతో ట్రాఫిక్ పోలీసులు రంగంలోకి దిగి యాక్సిడెంట్ కు కారణమైన వాహన డ్రైవర్ ను గుర్తించి అదుపులోకి తీసుకున్నట్లు అధికారులు వెల్లడించారు. అతని నిర్లక్ష్యపు డ్రైవింగ్ కారణంగా అతని వాహనం రోడ్డు పక్కన ఆగి ఉన్న రెండు వాహనాలను ఢీకొట్టింది. ఈ క్రమంలోనే నడుగుకుంటూ వెళ్తున్న తల్లి, ఆమె ఇద్దరు పిల్లలను ఢీకొట్టాడు. ఈ ప్రమాదంలో వారు తీవ్రంగా గాయపడ్డారు. మదీనాలోని అల్-హమ్రా పరిసరాల్లో ఈ ప్రమాదం జరిగిందని అధికారులు గుర్తించారు. కాగా, ఈ ప్రమాద వీడియోను సోషల్ మీడియాతో షేర్ చేసిన పలువురు నెటిజన్లు నిర్లక్ష్యపు డ్రైవర్ ని శిక్షించాలని డిమాండ్ చేశారు. నిర్లక్ష్యపు డ్రైవర్‌పై చట్టం నిర్దేశించిన జరిమానాలను వర్తింపజేయడానికి ట్రాఫిక్ అథారిటీకి సూచించినట్లు ట్రాఫిక్ పోలీసులు తెలిపారు.