యూఏఈ: నివాసితులు తమ ఆధార్ కార్డులకు సంబంధించిన పత్రాలను ఆన్‌లైన్‌లో ఉచితంగా అప్‌డేట్ చేసుకోవడానికి అనుమతించాలని భారత విశిష్ట గుర్తింపు ప్రాధికార సంస్థ (UIDAI) నిర్ణయించింది. నివాసితులు తమ డాక్యుమెంట్ వివరాలను ఆధార్ పోర్టల్‌లో అప్‌డేట్ చేసుకోవడానికి రూ.50 రుసుమును మినహాయించింది. ఈ ఉచిత సేవ మార్చి 15 నుండి జూన్ 14 వరకు మూడు నెలల పాటు అందుబాటులో ఉంటుంది.  అయితే,  ఆధార్ కేంద్రాలలో మాత్రం రూ.50 రుసుము వసూలు చేస్తారని తెలిపింది.   పేరు, పుట్టిన తేదీ, చిరునామా మొదలైనవి మార్చాల్సిన అవసరం ఉన్నట్లయితే, నివాసితులు సాధారణ ఆన్‌లైన్ అప్‌డేట్ సేవను ఉపయోగించవచ్చు లేదా సమీపంలోని ఆధార్ కేంద్రాన్ని సందర్శించవచ్చు.

ఎలా దరఖాస్తు చేయాలంటే..

ఆధార్ నంబర్‌ని ఉపయోగించి https://myaadhaar.uidai.gov.in/లో లాగిన్ కావాలి. రిజిస్టర్డ్ మొబైల్ నంబర్‌కు వన్ టైమ్ పాస్‌వర్డ్ (OTP) వస్తుంది.  ‘డాక్యుమెంట్ అప్‌డేట్’పై క్లిక్ చేయాలి. ఇప్పటికే ఉన్న కార్డ్ హోల్డర్ వివరాలు కనిపిస్తాయి. కార్డు హోల్డర్లు వివరాలను ధృవీకరించాలి. సరైనదని గుర్తించినట్లయితే, తదుపరి హైపర్‌లింక్‌పై క్లిక్ చేయాలి. తదుపరి స్క్రీన్‌లో, నివాసి డ్రాప్‌డౌన్ జాబితా నుండి గుర్తింపు రుజువు, చిరునామా పత్రాన్ని ఎంచుకోవాలి. పత్రాలను నవీకరించడానికి వాటి కాపీలను అప్‌లోడ్ చేయాలి.

గత దశాబ్దంలో ఆధార్ సంఖ్య భారతదేశంలోని నివాసితులకు విశ్వవ్యాప్తంగా ఆమోదించబడిన గుర్తింపు రుజువుగా మారింది. కేంద్ర , రాష్ట్ర ప్రభుత్వాలు నిర్వహించే దాదాపు 1,200 ప్రభుత్వ పథకాలు, కార్యక్రమాలు, సేవలను అందించడానికి ఆధార్ ఆధారిత గుర్తింపును ఉపయోగిస్తున్నాయి. అంతేకాకుండా బ్యాంక్‌లు, ఎన్‌బిఎఫ్‌సిలు మొదలైన ఆర్థిక సంస్థలతో సహా ప్రొవైడర్ల ద్వారా అనేక ఇతర సేవలు కూడా ఆధార్‌ నంబర్ నే ప్రమాణికంగా తీసుకుంటున్నారు.