రియాద్: పవిత్ర రమదాన్ మాసం ముగిసే వరకు సౌదీ అరేబియాలో వాతావరణం మేఘావృతమై ఉంటుందని నేషనల్ సెంటర్ ఆఫ్ మెటియోరాలజీ (NCM) ప్రతినిధి హుస్సేన్ అల్-ఖహ్తానీ తెలిపారు. రాజ్యంలోని కొన్నిప్రాంతాలలో వర్షం, చురుకైన ఉపరితల గాలులు దుమ్మును కదిలించవచ్చని వెల్లడించారు. సౌదీ అరేబియాలోని కొన్ని ప్రాంతాలలో మంగళవారం నుండి బుధవారం మధ్యాహ్నం వరకు వర్షాలు కురుస్తాయని NCM అంచనా వేసింది. రియాద్, హైల్, మదీనా, మక్కా మరియు అల్-ఖాసిమ్ ప్రాంతాలలో ఉరుములతో కూడిన వర్షాలు కురుస్తాయని, వడగళ్ళు- చురుకైన గాలులతో పాటు కుండపోత వర్షాలకు దారితీయవచ్చని NCM తెలిపింది. అల్-జౌఫ్, తబోక్, అల్-బహా, అసిర్, జజాన్, నజ్రాన్ ప్రాంతాలలో చురుకైన గాలులతో కూడిన ఉరుములు, అల్-షార్కియా ప్రాంతంలోని దక్షిణ ప్రాంతాల వరకు విస్తరించే అవకాశాలు ఉన్నాయని హుస్సేన్ అల్-ఖహ్తానీ తెలిపారు.