రియాద్: ప్రత్యేక ఆర్థిక మండలాల్లో సౌదైజేషన్ అవసరం లేదని, వాటికి ఇచ్చే ప్రోత్సాహకాలలో ఈ మినహాయింపు కూడా ఒకటి అని సౌదీ అరేబియా మానవ వనరులు, సామాజిక అభివృద్ధి మంత్రి అహ్మద్ అల్-రాజి ప్రకటించారు. ప్రపంచ పెట్టుబడిదారులను ఆకర్షించేందుకు ఈ నిర్ణయం తీసుకున్నట్లు తెలిపారు. సోమవారం ఇక్కడ సౌదీ స్పెషల్ ఎకనామిక్ జోన్స్ ఇన్వెస్ట్‌మెంట్ ఫోరమ్‌ను ఉద్దేశించి అల్-రాజి మాట్లాడారు. ప్రత్యేక ఆర్థిక మండలాల్లోని పెట్టుబడిదారులు సౌదీలను నియమించుకుంటే మానవ వనరుల అభివృద్ధి నిధి (HADAF) నుండి ప్రోత్సాహకాలు పొందుతారని స్పష్టం చేశారు. ప్రాథమిక ఆర్థిక వ్యవస్థతో పోలిస్తే ప్రత్యేక ఆర్థిక మండలాలు సౌదీకరణ నిబంధనలకు లోబడి ఉండవని అల్-రాజీ పేర్కొన్నారు. సౌదీ అరేబియా సోమవారం నాలుగు కొత్త ప్రత్యేక ఆర్థిక మండలాలకు అధికారికంగా లైసెన్స్‌లు జారీ చేసింది. అవి రియాద్, జజాన్, రాస్ అల్-ఖైర్ మరియు జెద్దాకు ఉత్తరాన ఉన్న కింగ్ అబ్దుల్లా ఎకనామిక్ సిటీలో ఉన్నాయి.