మస్కట్: జూన్ 21 నుండి సెప్టెంబరు 21 వరకు సలాలా విమానాశ్రయం అందుకోనున్న మొత్తం షెడ్యూల్డ్ విమానాల సంఖ్య 2,500 కంటే అధికంగా ఉంటుందని ఒమన్ ఎయిర్‌పోర్ట్స్ ప్రకటించింది. ఖరీఫ్ సీజన్ 2023 కోసం సలాలా ఎయిర్‌పోర్ట్ మొత్తం షెడ్యూల్డ్ విమానాల సంఖ్య 2,679కి చేరుకుంటుందని కంపెనీ ప్రకటించింది. ఇందులో 1,456 దేశీయ విమానాలు,  1,223 అంతర్జాతీయ విమానాలు ఉన్నాయని సలాలా ఎయిర్‌పోర్ట్‌లోని ఒమన్ ఎయిర్‌పోర్ట్స్ కంపెనీ ఎగ్జిక్యూటివ్ వైస్ ప్రెసిడెంట్ ఇంజి. జకారియా బిన్ యాకూబ్ అల్ హరాసి తెలిపారు.  ఈ టూరిజం సీజన్‌లో పర్యాటకులను స్వీకరించడానికి వ్యూహాత్మక భాగస్వాముల సహకారంతో సలాలా విమానాశ్రయం ఈ సంవత్సరం సిద్ధమవుతోందని అల్ హరాసి సూచించారు. గల్ఫ్ కోఆపరేషన్ కౌన్సిల్ (GCC) దేశాల రాజధానులు, ఇతర నగరాల నుండి విమానాశ్రయం 1077 ప్రత్యక్ష విమానాలను అందుకుంటుందని పేర్కొన్నారు. 2023 జనవరి చివరి వరకు అంతర్జాతీయ మరియు దేశీయ విమానాల సంఖ్య 43.1 శాతం పెరిగిందన్నారు. వైవిధ్యమైన సహజ అందాలు, అసాధారణమైన వాతావరణం, పర్యావరణ వైవిధ్యం కారణంగా వేసవి కాలంలో అరేబియా గల్ఫ్ దేశాలలో ధోఫర్ గవర్నరేట్ అత్యంత ప్రముఖ పర్యాటక ప్రదేశాలలో ఒకటిగా ఉంటుందని, దీంతో పర్యాటకులు తరలివస్తారని చెప్పారు.