ప్రస్తుత యాంత్రిక జీవనంలో ఎన్నో ఒత్తిడులు మనుషులపై ప్రభావం చూపుతుంటాయి. ఇలాంటి సందర్భంలో పొద్దున్నే లేవాలంటే కొంత కష్టంగానే అనిపిస్తుంది. పని చేయాలంటే ఇబ్బందిగా, బద్ధకంగా అనిపిస్తుంది. మళ్లీ నిద్రపోవాలనిపిస్తుంది. అతి కష్టంగా లేచినా బద్ధకం మాత్రం వదలదు. ఆ బద్ధకాన్ని వదిలించుకుని చురుగ్గా మారాలంటే ఇలా చేస్తే సరిపోతుంది.
- నిద్ర లేవగానే వెంటనే పనుల్లో పడకుండా, ఐదు నిమిషాల పాటు మౌనంగా కళ్లు మూసుకుని కూర్చోవాలి. ఆ రోజులో మీరు చేయాలనుకుంటున్న ఒక మంచి పని గురించి ఆలోచించాలి. దాన్ని పూర్తి చేయడానికి ప్రయత్నించాలి. ఎలాగైనా ఆ పనిని పూర్తి చేయాలనే దృఢసంకల్పం వల్ల ఉత్సాహం వస్తుంది.
- పొద్దున్నే తీసుకునే టిఫిన్ పోషకాలు మిళితమై ఉండేలా చూసుకోవాలి. ముఖ్యంగా మాంసకృత్తులూ, సంక్లిష్ట పిండిపదార్థాలూ అందేలా పాలూ, గుడ్లూ, చపాతీలూ, గోధుమ రవ్వ ఉప్మా వంటివి తీసుకోవాలి.
- రోజులో కాసేపయినా ఎక్సర్‌సైజ్ చేయడం ఓ అలవాటుగా మార్చుకోవాలి. ప్రశాంత వాతావరణంలో వ్యాయామం చేస్తే మంచిది. దీనివల్ల శరీరానికి స్వచ్ఛమైన గాలి అందుతుంది. శరీరానికి చురుకుదనం కూడా వస్తుంది.
- పొద్దున్నే హాయిగా నవ్వుకోవడం వల్ల మనసుకెంతో హాయిగా ఉంటుంది. బద్ధంగా అనిపించినప్పుడు ఒక పిప్పర్‌మెంట్‌ని నోట్లో వేసుకున్నా ఫలితం ఉంటుంది.
- సూర్యుడు వెలుగు వచ్చేంత వరకు పడుకోకుండా పొద్దున్నే లేచి వ్యాయామం చేయడం వల్ల ఆరోగ్యం, చురుకుదనం ఉంటుంది. దీనివల్ల మనం చేసే పనిలో నిర్లక్షం, అలసత్వం ఉండదు.